Бүтүн Арассыыйатааҕы «В гостях у ученого» уонна РФ Конституциятын үбүлүөйдээх тэрээһиннэрин чэрчитинэн, «Бастакылар хамсааһыннара» оҕо уонна ыччат улуустааҕы салаата оскуолаларга сырдатар, үөрэтэр, кэпсиир десаннары ыытар.
Ол курдук, Хатыҥ Арыы уонна Партизан орто оскуолаларыгар икки былаһаакканан «В гостях у ученого» бырайыагынан, специалист Сахаяна Алексеевна 9-10 кылаас үөрэнээччилэригэр «Чудеса науки» диэн өй турнирын ыыппыт. Оҕолор уус-уран лабораторияларга умсугуйан үлэлээбиттэр. Бу бырайыак науканы судургутук өйдүүргэ, кини мэлдьи биһигини иилии эргийэ сылдьарын билэргэ кыах биэрэр. Оонньуу кэмигэр үөрэнээччилэр наука араас хайысхаларыгар билиилэрин тургуппуттар уонна талан ылбыт салааларыгар бырайыак оҥорон көрбүттэр.
Бу дьыл ахсынньы 12 күнүгэр РФ сүрүн сокуона – Конституция 30 сыла бэлиэтэнэр. «Бастакылар хамсааһыннара» оҕо уонна ыччат улуустааҕы салаатын салайааччыта Анна Ядрихинская 8-с кылаас үөрэнээччилэригэр «Права человека» диэн дьарык ыыппыт. Оҕолор Арассыыйа Конституциятын туһунан үгүс туһалаах чахчыларын билбиттэр.
Сырдатар, үөрэтэр, кэпсиир десаннар улуус оскуолаларыгар салгыы ыытыллыахтара.
Лена Ноговицына