Улуустааҕы гимназияҕа олунньу 3 күнүгэр Николай Охлопков төрөөбүтэ 95 хонук хаалбытын бэлиэтиир үөрүүлээх линейка буолбут. Гимназия Охлопков Николай Семенович аатын сүгэр.
Үөрүүлээх линейкаҕа гимназия директора Александр Новгородов тыл эппит уонна үөрэнээччилэргэ “95 пятерок” акцияны биллэрбит. Бу үөрэх дьылыгар ааттаммыт бастыҥ үөрэнээччи Н.С. Охлопков бириэмийэтинэн наҕараадаланыаҕа.
Линейкаҕа Николай Охлопков кыргыттара кыттыыны ылбыттар.
Охлопкова Марианна Николаевна – өрөспүүбүлүкэ телевидениетин уонна радиотун туйгуна; Евразия телефорумун номинана; Саха Национальнай көрдөрөр-иһитиннэрэр хампаанньа кыһыл көмүс бэлиэ хаһаайына; өрөспүүбүлүкэ журналистарын Сойууһун “За вклад в журналистику” үрүҥ көмүс бэлиэ хаһаайына.
Екатерина Николаевна Охлопкова – СӨ үөрэҕин туйгуна; РФ уопсай үөрэҕин бочуоттаах үлэһитэ; “385 лет Якутия с Россией” үбүлүөйдээх бэлиэ хаһаайына.
Николай Семенович бэйэтин аатын дьоҥҥо үтүө сыһыанынан, үлэнэн үйэтитэр. “Киһини саныылларын, ахталларын тухары кини тыыннаах” (“Человек жив, пока его помнят”) норуот муудараһа этэр. Ол курдук, махтанар дьон кини сырдык аатын илдьэ сылдьыахтара. Оттон дьиэ кэргэнэ аҕаларын аатын ааттата туруохтара, ытыктыы, өйдүү-саныы сылдьыахтара.
Охлопков Николай Семенович – “Знак Почета” уордьан кавалера; норуоттар доҕордоһууларын уордьана; САССР тыатын хаһаайыстыбатын үтүөлээх үлэһитэ; САССР 7-11-с ыҥырыылаах үрдүкү сэбиэтин депутата; Нам улууһун уонна Дьокуускай куорат бочуоттаах олохтооҕо.
Николай Семенович САССР миниистрдэрин Сэбиэттэрин председателин солбуйааччытынан 36 сыл үлэлээбит, онтон бастакы солбуйааччынан 23 сыл.
Үрдүк дуоһунаска маннык өр сылларга ким да үлэлээбэтэх. Кини үлэлиир сылларыгар 5 председатель уларыйбыт. Николай Охлопков үлэлиир кэмнэригэр тутуу, ОДьКХ, энергетика, прошленность хайысхаларыгар үлэспит.