Нам улууһугар 2024 сылга оҕо спорка сыстарыгар, эт-хаан өттүнэн сайдыылаах буоларыгар Оҕо спордун сылын биллэрбиттэрэ. Киһи спортан доруобуйаны, бэрээдэктээх буолууну, өй-санаа, майгы-сигили хаачыстыбаларын ылар.
2024 сылы Ленскэй нэһилиэк баһылыга Петр Сокольников Нам сэлиэнньэтигэр Оҕо уонна ыччат спордун сыла биллэрбитэ. Сыл устата тэрилтэлэргэ, оскуола үөрэнээччилэрэ икки ардыларыгар күрэхтэһиилэр ыытылыннылар.
Нам сэлиэнньэтин оскуолаларын үөрэнээччилэрэ 5 түһүмэхтээх ГТО күрэхтэһиитигэр көрсүбүттэр.
Намнааҕы 1-кы нүөмэрдээх, Намнааҕы 2-с нүөмэрдээх, Намнааҕы 3-с нүөмэрдээх, Намнааҕы алын кылаас оскуолаларын, улуустааҕы гимназия 1-4 кылааһын кыргыттара уонна уолаттара имигэс, сымса эрчиллиилэргэ холоммуттар. 8 хамаанда киирсибититтэн Намнааҕы 1-кы нүөмэрдээх оскуола 2-с хамаандата бастыҥынан ааттаммыт. Иккис миэстэҕэ Намнааҕы 2-с нүөмэрдээх оскуола үөрэнээччилэрэ тахсыбыттар уонна үһүс миэстэни Намнааҕы 2-с нүөмэрдээх оскуола 1-кы хамаандата ылбыт.
Намнааҕы 1-кы нүөмэрдээх, Намнааҕы 2-с нүөмэрдээх оскуолаларын, улуустааҕы гимназия 5-8 кылааһын оҕолоро ГТО 5 түһүмэҕэр күрэхтэспиттэр. Орто сүһүөх кылаастарга Намнааҕы 1-кы нүөмэрдээх оскуола 1-кы хамаандата, иккис миэстэни улуустааҕы гимназия уонна үһүс миэстэни Намнааҕы 2-с нүөмэрдээх оскуола 1-кы хамаандалара ылбыттар.
Намнааҕы 1-кы нүөмэрдээх, Намнааҕы 2-с нүөмэрдээх оскуолаларын, улуустааҕы гимназия 9-11 кылааһын үөрэнээччилэрэ ГТО түһүмэхтэригэр бастыҥнары быһаарбыттар. Улахаттарга Намнааҕы 2-с нүөмэрдээх оскуола 1-кы хамаандата ылбыт. Иккиһи-үсүһү улуустааҕы гимназия уонна Намнааҕы 1-кы нүөмэрдээх оскуола хамаандалара ылбыттар.
Харысхан Попов