Нам улууһун урбаанньыттарыгар Намнааҕы Н.М. Рыкунов аатынан киин библиотекаҕа улууска урбааны салгыы сайыннарыы туһунан санаа үллэстиитэ буолла.
«Урбаанньыттар сүбэ мунньахтарыгар куруук эксперт ыҥырабыт. Бүгүн биһиэхэ «КУБ-А» дириэктэрэ Саргылана Петрова өй-санаа өттүнэн үгүс сүбэни биэрдэ«, — диир «Мой бизнес» киин сэбиэдиссэйэ Марфа Тарабукина.
Сүбэлэһии мунньахха сотору кэминэн атыы-эргиэн интернет нөҥүө барара күүскэ өтөн киирэрэ, киин сиртэн тэйиччи баар туристическай баазаларга интернет мөлтөҕө этиллэр. Бэлиэтээн эттэххэ, маннык сүбэлэһии кэпсэтиилэр улууска 2018 сыллаахтан тэриллэн хас сэрэдэ аайы ыытыллар.
Мунньах кыттыылаахтарыгар Ленскэй нэһилиэк олохтоох дьаһалтатын специалиһа Мария Дураева, «Бизнес-Инкубатор» туризмҥа специалиһа Люция Жиркова урбаан салаатыгар көмөлөр баалларын билиһиннэрдилэр. Улууска быйылгыттан толору хааччыллыылаах (благоустройство) урбаан өҥөтүн оҥорооччулар ночоотторун толуйуу көмөтө киирбитин Люция Михайловна иһитиннэрдэ.
Харысхан Попов