Устудьуоннар оскуола үөрэнээччилэрин кытта көрсүһүү тэрийдилэр

Дойду үрдүнэн тохсунньу 25 күнүгэр “Татыйаана” устудьуоннар күннэрэ бэлиэтэнэн ааспыта. Ол чэрчитинэн, З.П. Саввин аатынан Үөдэй орто оскуолатыгар М.К. Аммосов аатынан Хотугулуу-Илиҥҥи федеральнай университет устудьуоннара үөрэнээччилэри кытта көрсөннөр биир умнуллубат түгэни бэлэхтээтилэр, иһирэх уонна туһалаах көрсүһүүнү тэрийэн ыыттылар.

Ол курдук, Үөдэйбит нэһилиэгин ыччата, норуоттар тылларын уонна култуураларын үөрэтэр институт 4-с куурсун устудьуонката Уйгулаана Ефремова, ИЯКН устудьуоннарын ортотугар уопсатыбаннай профсоюз тэрилтэтин бэрэссэдээтэлэ салайааччылаах 1-4-с куурустан уопсайа 22 устудьуон кэлэн көхтөөх тэрээһини ыытта диэн иитэр үлэҕэ дириэктэри солбуйааччы Надежда Колодезникова иһитиннэрдэ.

Улуу Кыайыы 80 сылын көрсө “Саабын сыдьааннара” оскуола актива устудьуоннарга станцияларынан квест оонньуу ыыппыттар. Спорт көрүҥэр доҕордоһуу волейболун оонньоон оскуола үөрэнээччилэрин хамаандата кыайыылаах тахсыбыт. Устудьуоннар профориентационнай бэсиэдэ ыыппыттарын үөрэнээччилэр сэргии истэннэр, инники соруктарыгар былааннары ылыммыттар.

Түмүккэ икки өттүттэн музыкальнай эҕэрдэлэрин анаан, кыра сэмэй бэлэхтэри туттарсан бу күнү олус сэргэхтик атааран, инникигэ эрэллээх үөрэн-көтөн тарҕаспыттар.

Екатерина Эверстова, Үөдэй

Читайте дальше