Өрөспүүбүлүкэбитигэр от ыйын 26 күнүттэн эрэгийиэн икки ардынааҕы «Уу – куттала суох территория!» («Вода – безопасная территория!») аахсыйа үһүс түһүмэҕэ саҕаланна. Ону кытта СӨ ЫБМ кылаабынай Управлениетын кыра уйуктаах уу аалларын киинин судаарыстыбаннай инспекцияларын бары салаалара СӨ судаарыстыбаннай баһаары утары сулууспатын инспектордарын кытта күн аайы өрүс биэрэктэринэн, күөл кытыыларынан холбоһуктаах рейдэҕэ тахсаллар.
Аахсыйа саҕаланаатын кытта Нам улууһун кыра уйуктаах уу аалларын судаарыстыбаннай инспекциятын (ГИМС) салайааччыта Вячеслав Мохначевскай, инспектордар Ион Кулаковскай, Иннокентий Осипов «Нам улууһа» МТ 23 №-дээх судаарыстыбаннай баһаарынай сулууспа сотрудниктарын Юрий Новгородовы, Лидия Иванованы кытта дьон сөбүлээн сынньанар Граф Биэрэгин, Хамаҕатта боротуохаларын кумахтаах биэрэктэринэн, Нам с. Туллугар холбоһуктаах рейдэҕэ сырыттылар. Кинилэр уу кытыытыгар сынньанааччы оҕолорго, улахан дьоҥҥо уонна көрсүбүт балыксыттарыгар ууттан сэрэхтээх буолуу быраабылаларын санаттылар, ону сырдатар, тутуһар листовкалары, оттон баһаарынньыктар уоттан сэрэхтээх буолууга инструкциялары, баһаар кутталын өйдөтөр матырыйааллары тарҕаттылар.
Намнааҕы ГИМС иснпектордара «Уу – куттала суох территория!» аахсыйа чэрчитинэн ууттан сэрэхтээх буолууну өйдөтөн, сэрэтэн Түбэ, Маймаҕа нэһилиэктэригэр холбоһуктаах рейдэлэрин ыытыахтара.
Касьян Олесов-Олук