Илья Винокуров аатынан Намнааҕы педагогическай колледжка ахсынньы 9-10 күннэригэр волейболга күрэхтэһии буолбута. Волейболга Намнааҕы педколледж Кубогар 22 төгүлүн ыытыллыбыт улуустааҕы аһаҕас күрэхтэһиигэ барыта 150 кыттааччылаах 19 хамаанда кэлбит.
“Күрэхтэһиигэ 18 араас анал ааттар олохтоммуттара. Бастыҥ оонньооччуларынан Хамаҕаттаттан Диана Готовцева, Альберт Николаев (Хамаҕатта), Намнааҕы педколледжтан Гаврил Александров ааттаммыттара.
Кыайыылаахтар кубоктарынан, мэтээллэринэн наҕараадаламмыттара. Ону таһынан, харчынан бириистэр, сертификаттар туруоруллубуттара”, – диир тэрийээччи Юрий Эверстов.
Намнааҕы педколледж хамаандалара дьахталларга 4 миэстэ; эр дьоҥҥо 1 миэстэ; ветеран эр дьоҥҥо 1 миэстэ буоланнар уопсай түмүккэ эрэллээхтик бастакы үктэлгэ тахсыбыттар. Хамаҕатта оонньооччулара дьахталларга – 3; эр дьоҥҥо – 2; ветеран эр дьоҥҥо – 3 миэстэлэри ыланнар уопсайга 2 буолаллар. Дьахталларга – 1; эр дьоҥҥо – 3; ветеран эр дьоҥҥо – 6 миэстэ көрдөрүүлээх Хатыҥ Арыы нэһилиэгэ 3 миэстэҕэ турар. Уопсай түмүгүнэн ыллахха, бириистээх миэстэлэри ылбыт хамаандалар бэйэ-бэйэлэриттэн иккилии очко арыттаах куоһарыыны көрдөрбүттэр. Хатырыктар эмиэ бэрт кыранан, уопсай түмүккэ 13 очконы ыланнар 4 миэстэ буолан хаалаллар. Этэллэрин курдук, тыҥааһыннаах оонньуулар буолбуттарыттан маннык түмүктэр тахсаллар.
Орто нэһилиэктэр Үөдэй уонна Партизан ветеран эр дьоҥҥо 2 (Үөдэй) уонна 4 (Партизан) миэстэлэри ылары ситиспиттэр. Эмиэ үчүгэй көрдөрүү. Бу нэһилиэктэр дьахталларга уонна эр дьоҥҥо хамаанда туруорбуттара буоллар, күрэхтэһии өссө сытыырхайыа хаалбыт. Ол эрээри, ол күн улууска элбэх күрэхтэһиилэр тэҥинэн ыытыллыбыттарын этэр тоҕоостоох.
Василий Сивцев, “Намҥа спорт сайдыытыгар өҥөтүн иһин” бэлиэ хаһаайына, спорт ветерана:
— НПК Кубога волейбол күрэхтэһиитэ үрдүк таһымҥа ааста. Үгэскэ кубулуйбут күрэхтэһии сүүһүнэн волейбол сүгүрүйээччилэрин түмэр. Хара маҥнайгыттан эр дьоҥҥо, дьахталларга уонна бэтэрээннэргэ олус тыҥааһыннаах киирсиилэр буолан саҕаламмыттара. Күрэхтэһии уратыта, нэһилиэк үс хамаанданы туруорар. Уопсай түмүк хас биирдии хамаанда хайдах оонньообутунан таһаарыллар буолан, очко сыаната олус күндү. Маны хамаанда хас биирдии чилиэнэ өйдүүр.
Ветераннарга алта хамаанда илин-кэлин түһүстэ. Ол курдук, спорт бу көрүҥэр хамаанда туруораннар бэриниилээхтэрин көрдөрөллөр: Үөдэй, Партизан (1 Хомустааҕы кытта холбоһон), Хамаҕатта, Хатыҥ Арыы, Хатырык уонна НПК ветераннара. Кинилэр билигин да эдэрдии эрчимнэрин ыһыктыбакка киһи сэргии көрөр бэрт киирсиилэри көрдөрбүттэрэ.
Күрэхтэһиигэ хаһан баҕарар, ким ордук бэлэмнээх, дьарыктаах ол кыайар. Кимиэхэ да иннин биэрбэтэх НПК хамаандата эрэллээхтик бастаабыта; иккиһи эдэр эрдэхтэриттэн бииргэ эрчиллибит, күрэхтэспит Үөдэй хамаандата ылбыта; үһүскэ Хамаҕатта ветераннара тахсыбыттара.
Эверстов Юрий Афанасьевич, Терехов Вячеслав Семенович колледж баазатыгар ветеран волейболистары мунньан дьарыктыыллара, араас таһымнаах күрэхтэһиилэргэ кытыннараллара олус хайҕаллаах. Түгэнинэн туһанан махталбытын тиэрдэбит! Улуус, өрөспүүбүлүкэ туһугар ыытар үлэлэрэ үтүө түмүктэрдээх буоларыгар баҕарабыт!
Харысхан Попов