«Якутия с тобой!» өрөспүүбүлүкэтээҕи общественнай хамсааһыҥҥа бэйэлэрин баҕаларынан үгүс дьон кыттыһар. Бу хамсааһын байыаннай дьайыы кыттыылаахтарыгар көмө оҥорор. Үтүө дьыалаҕа Хамаҕаттаттан төрүттээх Дьокуускай олохтооҕо Ньургуйаана Готовцева өрүү кыттыһарын билэн, бүгүн Арассыыйаҕа Волонтер күнүнэн даҕатан, сибээстэһэ сырыттым.
Ньургуйаана Прокопьевна уола байыаннай дьайыыга сылдьар буолан, волонтердары кытта былырыын алтынньыга билсибит, быыс буллар эрэ көмөлөһөр. Кэргэнэ Андрей Артурович гуманитарнай ыстаап сакааһынан 160 устуука крюк-кошка оҥорон туттарбыт. Ийэ киһи бэс ыйыттан сетка баайан көмөлөһөн саҕалаабыт. Ый аайы наскы, ис таҥас, бэргэһэ, бэрчээккэ курдук таҥастары аҕалан туттарар. Билигин вещмешок, балаклава икки көрүҥүн, плащпалатка тигэргэ көмөлөһө сылдьар.
— «Якутия с тобой!» ыстаап былырыын балаҕан ыйын 26 күнүгэр тэриллибит. Салайааччынан Айыл Дьулурха Мааттыс уола үлэлээбит, билигин Айыллаан Васильевич Винокуров салайар. Солбуйааччынан Анна Николаевна Ефимова үлэлиир.
Бүгүҥҥү туругунан 80-тан тахса туонна таһаҕас хомуллан ыытыллыбыт, 1800-тэн тахса волонтер кэлэн үлэлээбит, ону таһынан иистэнэр сыах үлэлии турар.
Намҥа Максимова Елена Валерьевна ыҥырыытынан Олоҥхо дьиэтигэр тиийэн маастар-кылаас ыыппыттар.
Гуманитарнай ыстаапка күн аайы СВО-ҕа анаан улуустартан көмө кэлэ турар, тэрилтэлэр, биэнсийэлээхтэр, устудьуоннар, ыччаттар кыттыһаллар, — диэн түмүктүүр волонтер Ньургуйаана Готовцева.
Мария Винокурова