Вячеслав Дьяконов “Дыгын оонньууларыгар” эргиллиитин кыайыынан бигэргэттэ

Уус Алдаҥҥа Чемпион Кубогын үһүс төгүлүн ылбыт Вячеслав Дьяконовы аны сайын “Дыгын оонньууларыгар” тахсарын күүтүөхпүт.

Чахчы Дьяконов дьарыктааҕын, толору күүһүн бу иккис сүүмэрдиир түһүмэххэ дакаастаата. 7 көрүҥ түмүгүнэн Нам боотура 42 очукуо ылла. Вячеслав Дьяконов кэнниттэн 66 очукуолаах Николай Обоев уонна 69 очукуолаах Яков Дмитриев кэлэллэр.

“Уус Алдаҥҥа табыллан кииристим. Арай үс төгүл үс ыстаныыбар 11, сүүрүүгэ 12, уонна ох саанан ытыыга 10 миэстэ буоллум. Тэҥнээн көрдөххө, I-кы сүүмэрдиир түһүмэххэ тохтобул кэнниттэн кэлбитим биллэрбитэ.

Кыайыыбын ийэбэр аныыбын. “Кубогы төнүннэр” диэн этиитэ миэхэ сыал-сорук, күүстээх өйөбүл буолар. Намым улууһун дьоно-сэргэтэ, салалтата, биир дойдулаахтарым куруутун күүс-көмө, өй-санаа буоларгытыгар, күүс-уох эбэргитигэр күүскэ махтанабын”, – диир Вячеслав Дьяконов.

Бэҕэһээ, бүгүн күүһүн-уоҕун түмэн тутум эргииргэ 68-та эргийбит; мас-рестлиҥҥэ 4-с миэстэ; хапсаҕайга 2-с миэстэ; 125 киилэ ыйааһыннаах куулу 142 м ыраахха илдьэн 2-с миэстэ буолбут, түһүлгэҕэ ох курдук оҥостон тахсыбыт Вячеслав Дьяконов аатын өрө тутабыт.

Харысхан Попов

Читайте дальше