Бүгүн М.К. Аммосов аатынан Культура уонна духуобунай сайдыы дыбарыаһыгар Арассыыйаҕа Дьиэ кэргэн, СӨ Оҕо аймах, улууска Оҕо спордун сылларын аһыллыыта буолла. Үөрүүлээх тэрээһин туһунан Хамаҕатта дьаһалтатын социальнай боппуруостарга кылаабынай специалиһа Алена Аммосова билиһиннэрдэ:
— Улуус нэһилиэктэриттэн уһуннук, бэриниилээхтик олорбут дьиэ кэргэттэри чиэстээһиҥҥэ улуус баһылыгын социальнай боппуруостарга солбуйааччы Юрий Дьяконов, ГТАС управлениетын салайааччыта Марина Кокарева, нэһилиэк баһылыктара эҕэрдэлээтилэр.
Хамаҕатта нэһилиэгиттэн Надежда Варламовна, Александр Николаевич Федоровтар ыал буолбуттара — 55, Анна Афанасьевна, Михаил Григорьевич Кокаревтар 50 сылларынан наҕараадаланнылар, сертификат туттулар. Федоровтар «Золотые семьи Якутии» кинигэҕэ киирбиттэринэн бэлэх кинигэ ыллылар.
Нэһилиэкпит ытык-мааны дьонун ыал буолуу үтүө холобурун көрдөрбүт бэлиэ күннэринэн эҕэрдэлиибит, бары үчүгэйи баҕарабыт!
Мария Винокурова