Бүгүн Төрөөбүт тыл уонна сурук-бичик күнэ. Саха тылын билиҥҥи туругун уонна кэнчээри ыччаты төрүт тылга уһуйуу туһунан, Модут орто оскуолатын саха тылын уонна литературатын учуутала Владимир Иванович Гуляев санаатын үллэстэр:
— Саха тылын билиҥҥи туруга сүрдээх уустук дии саныыбын. Кэлиҥҥи 5-6 сылга нуучча тылын сабыдыала олус түргэнник баһыйыах да курдук буолла. Оннооҕор тыа сиригэр саха эрэ уутуйан олорор сирдэригэр оҕолор, ордук кыра саастаах оҕолор нууччалыы саҥарар буоллулар. Итини олохпут хаамыытын кытта тэҥниэххэ сөп.
90-с сыллардааҕы уонна билиҥҥи оҕолору тэҥнээн көрөр эбит буоллахха, урукку оҕолор кэм кинигэни ааҕар этилэрэ, билиҥҥи оҕо кинигэни аахпат буолла. Бу олус элбэҕи этэр… Ис иһиттэн ааҕар биир эмэ оҕо баар.
Уус-уран айымньыны ааҕар киһи өйө-санаата, билиитэ сайдар, тыла-өһө баай, билиитэ чиҥ, кэпсиир, саҥарар, суруйар дьоҕура сайдыбыт буолар. Билиҥҥи оҕо аахпат буолан элбэҕи сүтэрэр, тылы үчүгэйдик билбэт, сүнньүнэн кэпсэтии эрэ тылын билэр, тылын баайа дьадаҥы.
Дьиэбит иһигэр саха эйгэтин тэрийиэххэ. Билигин саха тыллаах араас ойуулаах остуоруйалар, кэпсээннэр, оҕо интэриэһин тардар комикстар кинигэлэрэ, сурунааллар элбэхтэр. Төрөппүттэр оҕо туһугар атыылаһан бастаан тэҥҥэ аахсан биэриэххэ наада. Оччоҕуна бэйэтэ умсугуйан ааҕар буолуоҕа. Сахалыы сурунаалларга уонна оҕо хаһыаттарыгар суруттарыахха наада.
Кэпсэтиибитин сиһилии «Эҥсиэли» хаһыаппыт бүгүҥҥү 6-с нүөмэригэр ааҕыҥ.
Семен Аргунов