Бүгүн Улуу Кыайыы күнүгэр диэри 100 хонук хаалбытын бэлиэтээн, Үөдэй нэһилиэгэр Кыайыы Скверыгар Аҕа дойду улуу сэриитин уоттаах толоонугар охтубут буойуннарга анаммыт Памятникка ытыктабыл бэлиэтэ гирлянда уурулунна.
Миитиҥҥэ нэһилиэк баһылыга Иван Гаврильев, ытык сүбэһит, наставник «Ийэҕэ албан» түмэл салайааччыта Алексей Яковлев, наставник Петр Федотов иһирэх тыллары эттилэр. Ытык бэтэрээннэргэ сүгүрүйэр, ааттарын үйэтитэр ытык иэспит, чиэстиир, бэлиэтиир эбээһинэспит буоларын өссө төгүл бигэргэтэн эттилэр.
Тэрилтэ салайааччылара, нэһилиэк депутаттара, общественность, олохтоохтор суолталаах тэрээһиҥҥэ, ол ааспыт иэдээннээх сылларга олохторун толук уурбут буойуттарбытын кэриэстээн биир мүнүүтэҕэ чуумпуран турдулар.
Быйыл нэһилиэккэ «Кыайыы уонна дойдуга бэриниилээх буолуу» сылыгар былааннаммыт үлэлэри олоххо киллэрэн, дойдубут туһугар бары күргүөмнээх үлэҕэ турунуоҕун диэн баһылык Иван Васильевич бар дьонун ыҥырда.
Түмүккэ, «Сарыал» сынньалаҥ киин коллектива тэрилтэлэргэ Улуу Кыайыы күнүгэр диэри төгүрүк дааталарынан бэлиэтэммит халандаары бэлэх ууннулар.
Екатерина Эверстова, Үөдэй