Үөдэй нэһилиэгэр СӨ правительствотын отчуотугар 80-тан тахса киһи муһунна. Мунньахха Уһук Илин федеральнай уокурукка СӨ бастайааннай бэрэстэбиитэлэ Ким Борисов дакылаат оҥордо. Онтон кэпсэтиигэ, этиигэ киирдилэр.
Олохтоохтор мобилизацияламмыт дьону төнүннэрии, миграционнай үлэ, оскуола музейдарыгар штат көрүүтүн, директор сүбэһитэ диэн саҥатык идэлээхтэр тугунан дьарыктаналларын туһунан ыйыттылар. Ил Түмэн депутаттара сокуоҥҥа уларыйыы тахсарын уонна уопсай үлэлэрин туһунан нэһилиэнньэ иннигэр сылга иккитэ отчуоттуохтара этэ диэн санааларын эттилэр.
Тыа хаһаайыстыбатыгар ураты улахан болҕомто наадатын этэн туран, кэлиҥҥи сылларга таҥнары сатыылааһын көстөрүн, маннык салҕаннаҕына тыа сиригэр олох огдолуйуо, сайдыы тохтуо диэн мунчаарар санааларын үллэһиннилэр. Онон бу боппуруоска күүстээх үлэ барыахтаах диэн санааларын эттилэр. Өртөөһүн боппуруоһа бу да сырыыга киирдэ. Ардахтатыы үлэтин бэс ыйыгар ыытар наадатын эттилэр. Уһук Илиҥҥэ тыа хаһаайыстыбатын сайдыытын сурастылар. Сааскы халаан уутугар эстэрии үлэлэри нэһилиэнньэҕэ куттал суоһаатаҕына эрэ ыыталлара буоллар сир-дойду нүөлсүйүө этэ, оччоҕо үүнүү, тыа хаһаайыстыбата уопсайынан да тупсуо этэ диэтилэр. Даамбаны салгыы үрдэтии, шлюз оҥоруу туһунан эттилэр.
Ону таһынан, Донецкай уобалас Кировскай куоратыгар Саха сирэ үлэни-хамнаһы ыытарынан онно сахалар үлэлииллэр дуо диэн ыйытыы киирдэ. Устудьуон этэрээтин онно ыытыахха диэн этии быһыытынан киллэрдилэр. Өлүөнэ өрүһү туоруур муоста тутуутун үбэ-харчыта федеральнай бюджекка көрүллүбүтүн суоҕун ыйыттылар.
Кулууп дьиэтин тутуутун күүскэ туруорсалларын эттилэр. Ону сэргэ, Василий Зырянов аатынан народнай ансамбльга хормейстер штатын көрүллүүтүн, эдэр специалистарга дьиэ тутуллуутун, сайылыкка уот тардыллыытын, элбэх оҕолоох дьиэ кэргэн социальнай гаастааһыҥҥа кыайан хапсыбатын, баһаарынай чаас үлэһиттэрин хамнастара үрдүүрүн, оскуола капитальнай өрөмүөнүн ыытыллыытын туһунан ыйыттылар.
Киирбит ыйытыыларга министерстволар, департаменнар представителлэрэ сиһилии хоруй биэрдилэр. Олохтоохтор толору хоруйу 30 хонук иһигэр күүтэллэрин санатан туран, Правительство үлэтин биһирииллэрин биллэрдилэр. Бөлөх салайааччыта Ким Борисов үөдэйдэргэ махтанна, салгыы бииргэ үлэлиэххэ-хамсыахха диэн мунньаҕы түмүктээтэ.
Анна Созонова