Үөдэйдэр: «Уот тоҕо кыһыннары-сайыннары арахсарый, туох кыаллыбатый, тоҕо сөптөөх үлэ ыытыллыбатый бу салааҕа?!»

Тыа хаһаайыстыбатыгар Нам улууһун баһылыгын солбуйааччы Филипп Николаев салайааччылаах отчуоттуур 3-с бөлөх бүгүн Үөдэйгэ, 1-кы Хомустаахха үлэлиэҕэ.

Тутатына, хайа да нэһилиэккэ сырыы ахсын туруорсуу, ыйытыы биир: үлэ штатын чуолкайдаһыы, саҥа тутууну ыытыы, капитальнай өрөмүөҥҥэ үп-харчы көрүү. Холобура, нэһилиэнньэ үлэ штатын көрдүүр, эрээри… Саамай ирдэнэр хайысхаларга үлэ миэстэтэ тахсарыгар улуус бэйэтин иһигэр аттаран сааһылаатаҕына, бэрээдэктээтэҕинэ кыаллар суол.

Үөдэйдэр Нам улууһун олохтоохторо бука бары киэн туттар киһибит Владимир Татаринов 80 сааһын туолбут сылыгар Нам улууһун култуурата тэрээһиннэр ыытыллалларын, бэлиэтээһини былааҥҥа туруорара дуу диэн ыйытыыга тохтууллар. Кырдьыга, Владимир Татаринов «Умнуллубат 10-с кылаас», «Хаар» диэн уостан түспэт ырыалара күн бүгүҥҥэ диэри оҕолорго, ыччакка, аҕам саастаахтарга ылланаллар.

Александр Ядреев долгутуулаах ыйытыыны туоһуласта: Россия үрдүнэн муниципальнай тэриллиилэри холбуур сокуон оҥоһулла сылдьарыгар, кэлин тохтотуллубутун истэн аһарбытын. Бу сокуон оҥоһуллуута төһө оруннааҕый диэҥҥэ сокуон ситэтэ суоҕунан билиҥҥитэ тохтотуллан турара этиллэр.

Атын улуустарга үһүс көлүөнэ дьоҥҥо лааҕырдар тэриллэн үлэлииллэрин курдук Нам улууһугар инникитин оннук лааҕырдар баар буолуохтара дуо диэҥҥэ ыйытыы туруоруллар.

«Уот тоҕо кыһыннары-сайыннары арахсарый? Туох кыаллыбатый, тоҕо сөптөөх үлэ ыытыллыбатый бу салааҕа, толору?! Уһун кыһын устата дьиэ, хотон тоҥмотугар сыра-сылба баранар», — диир хаһаайыстыбалаах Алла Бережнева.

Санаан кэбиһиҥ, Үөдэйгэ 10-тан тахса бааһынай хаһаайыстыбалаах дьон олорорун Алла Борисовна этэн аһарда. Маны этэн туран, хаһаайыстыбалаахтар, олохтоохтор уот барыытыгар үгүс ыарахаттары көрсөллөрө чопчуланар.

Үөдэй нэһилиэгэ улууска элбэх дьоруой Ийэлээҕинэн биллэр. Манан сибээстээн, нэһилиэккэ хайаатар да Ийэ скверэ баар буолуутун күүскэ этэллэр.

Үс күннээх отчуот түмүгүнэн, «Биһиги эттибит, эһиги оҥоруҥ» диэн санаанан олорбокко бары кыһаллыахха диэн Филипп Васильевич эппитэ оруннаах. Сарсын 3-с бөлөх сүрүн бөлөҕү кытта холбоһон Нам сэлиэнньэтин олохтоохторун кытта көрсүөхтэрэ.

Харысхан Попов

Читайте дальше