Нам улууһугар Альберт Ильин аатынан кыһыҥҥы спартакиада буолуоҕа. Үөдэй нэһилиэгэр муус устар 5 күнүгэр нэһилиэктэр хоккейга уонна ойбону алларыы түһүмэхтэригэр көрсүөхтэрэ. Оттон муус устар 6 күнүгэр хайыһарынан күрэхтэһиигэ, шорт трекка уонна хоккейга кыайыылаахтар быһаарыллыахтара.
Альберт Ильин кэриэһигэр ыытыллар кыһыҥҥы спартакиада улуустааҕы комплекснай спартакиада суотугар киирэр. Шорт-трекка икки эр киһи 500 м, дьахтар 300 м сүүрүөхтэрэ. Хайыһарынан күрэхтэһиигэ эр киһи уонна ветеран эр киһи 3000 м; дьахтар уонна ветеран дьахтар 1500 м бастыҥнары быһаарсыахтара. Ону тэҥэ, эстафетаҕа хас биирдии хайыһардьыт 1000 м сүүрүөҕэ. Быйыл спартакиадаҕа ойбон алларыыта саҥа көрүҥ быһыытынан киирбит. Хамаандаҕа очко аҕалар иһин, үс эр киһи ойбон алларыаҕа.
Нам улууһугар кыһыҥҥы спартакиада Ильин Альберт Иннокентьевич аатын былырыыҥҥыттан сүгэр. Нам улууһун баһылыгынан Альберт Иннокентьевич 2008-2013 сылларга олус таһаарыылаахтык үлэлээбитин дьон-сэргэ ахтар. Намнары Нам дэппит үтүө баһылык Нам улууһун хас биирдии нэһилиэгэр суолу-ииһи хаалларбыт, сүҥкэн тутуулары, үлэни-хамнаһы тэрийбит биир бастыҥ салайааччынан ааҕылларын билиҥҥи салалта ахтар.