Үөдэй нэһилиэгэр Олоҥхо декадатын үөрүүлээх аһыллыыта буолла. Сэтинньи 24 күнүгэр “Сарыал” сынньалаҥ киин үлэһиттэрэ “Олоҥхо дойдутун оҕолоро” тэрээһини иилээн-саҕалаан тэрийэн ыыттылар. Сиэр-туом быһыытынан, кэлбит ыалдьыттары арыылаах алаадьынан үөрэ-көтө көрүстүлэр. Саха тыынын уһугуннарар, турукка киирэр сахалыы төрүт дорҕоон муусуката ураты эйгэни үөскэттэ. Саалаҕа олоҥхо дьоруойдарын дьүһүйэн көрдөрөр бэйэ оҥоһук куукулалар уонна олоҥхону киэҥник кэпсиир кинигэ быыстапката туран көрөөччү интэриэһин тарта.
Тэрээһиҥҥэ А. Шестаков аатынан улуустааҕы норуот айымньытын киинин фольклор куруһуогун уһуйааччыта, улуустааҕы олоҥхо күрэҕин 5 төгүллээх кыайыылааҕа, ыччат муҥха олоҥхотун муҥутуур кыайыылааҕа, Үөһээ Бүлүү улууһугар ыытыллыбыт Олоҥхо ыһыаҕын II үрдэл хаһаайката, “Саха” национальнай көрдөрөр-иһитиннэрэр хампаанньа үһүс төгүлүн ыытыллар “Олоҥхо-баттл” бырайыагын III бочуоттаах миэстэ кыайыылааҕа, Үөдэйтэн тардыылаах биир дойдулаахпыт Вера Прокопьевна Цыпандина ыҥырыылаах ыалдьыт быһыытынан кыттыыны ылла. Кини толоруутугар Е.Г.Охлопков-Буоратай “Алантай Боотур” олоҥхотун кэлбит дьон оллоонноон олорон, “ноо…” диэн сэҥээрэ иһиттилэр. Нэһилиэк баһылыга Иван Гаврильев, “Сарыал” сынньалаҥ киин уус-уран салайааччыта Мария Кельциева ис сүрэхтэн махтанан сэмэй кэһиилээх махтал суруктары туттардылар. Кэлбит дьон сөҕөн махтанан Вера Цыпандинаҕа тус санааларын этэн, олоҥхо киэҥ куйаарыгар умнуллубат түгэни бэлэхтээбитигэр махтаннылар, айымньылаах киэҥ үлэтигэр ситиһиилэри баҕардылар.
Декада чэрчитинэн нэһилиэк баһылыгын планерката сэтинньи 26 күнүгэр олохтоох библиотека дьиэтигэр ыытылынна. Күннээҕи олох-дьаһах, үлэ-хамнас, ыытыллыахтаах инники былааннар торумнара манна кэпсэннэ. Ол кэннэ, сахалыы таба суруйуу үөрэҕин сайыннаран өрөспүүбүлүкэтээҕи “Олоҥхо дьыктаана-2024” аахсыйаҕа бука бары кыттыыны ыллылар. Манна П.А.Ойуунускай “Дьулуруйар Ньургун Боотур” олоҥхотуттан быһа тардан дьыктаан суруйдулар. Маны таһынан, уһуйааҥҥа, оскуолаҕа Олоҥхо декадатынан үгүс тэрээһиннэр, аһаҕас уруоктар, дьарыктар ыытылла тураллар.
Екатерина Эверстова