Үөдэйгэ билигин 91-с хаарыгар үктэммит икки тыыл ветерана Елизавета Николаевна Владимирова, Прокопий Иннокентьевич Скрябин бааллар, сэрии кэмин оҕолоро — 12-лэр.
Ыам ыйын 7 күнүгэр З.П. Саввин аатынан Үөдэй орто оскуолатыгар “Кыайыы уруоктара” 1-11 кылаас үөрэнээччилэригэр ыытылынна. “Үөдэй нэһилиэгин ини-биилэрэ уоттаах сэрии суоһар сылларыгар” диэн тиэмэҕэ нэһилиэк сүбэтин наставниктара кыттыылаах 5-11 кылаастарга буолан ааста. Оскуола түмэлин салайааччыта Алексей Дмитриевич Яковлев, доруобуйаларынан хааччахтаах сэбиэт бэрэссэдээтэлэ Анастасия Семеновна Сысолятина, олохтоох библиотекарь Ксения Степановна Сидорова, баһаарынай чаас начальнига Иннокентий Афанасьевич Зырянов, Үөдэй нэһилиэгин дьаһалтатын сүрүннүүр специалиһа Екатерина Алексеевна Эверстова биир дьиэттэн Аҕа дойду сэриитигэр ыҥырыллыбыт буойуттар тустарынан оҕолорго сиһилии сырдаттылар, кинилэр үтүө ааттарын кэриэстээн ахтан-санаан аастылар.
Ыччат хамсааһынын салайар нэһилиэк дьаһалтатын специалиһа Варвара Тимофеева “Саабын сыдьааннара” оҕо тэрилтэтин кытта “Георгиевскай лиэнтэ”, “Кыһыл гвоздика” акциятын ыыттылар, уопсайа 100-кэ гвоздиканы, георгиевскай лиэнтэни олохтоохторго, ветераннарга түҥэттилэр. Оскуола оҕолоро ветераннарга бэлэх сувенирдары, открыткалары оҥорон туттардылар.
Ыам ыйын 8 күнүгэр Бүтүн Россиятааҕы “Өйдөбүнньүк чүмэчи” аахсыйа Кыайыы скверигэр ыытылынна. Манна мустубут хас биирдии дьон, дьиэ кэргэнинэн кэлэн чугас дьоннорун, аймахтарын, аҕаларын, эһэлэрин кэриэстээн, сэрии толоонугар охтубут буойуттарга “Помним” суругу таһааран өйдөбүнньүк чүмэчини уурдулар.
Ыам ыйын 9 күнүгэр Улуу Кыайыыны уруйдуур параад уонна бэтэрээннэри чиэстиир күн тэрээһиннээхтик ааста. Оскуола үөрэнээччилэрэ, уһуйаан иитиллээччилэрэ, нэһилиэк бары тэрилтэлэрэ, общественность колоннанан хааман Кыайыы Скверыгар үөрүүлээх миитиҥҥэ кыттыыны ыллылар. Нэһилиэк баһылыга Иван Васильевич Гаврильев, СӨ Ил Түмэн Государственнай мунньаҕын депутата Эдгар Валентинович Константинов, Нам улууһун баһылыгын солбуйааччы Филипп Васильевич Николаев, нэһилиэк наставниктарын сүбэтин чилиэнэ Анастасия Семеновна Сысолятина ытык ветераннары, сэрии кэмин оҕолорун, параад кыттыылаахтарын Кыайыы күнүнэн эҕэрдэлээтилэр.Нэһилиэк общественноһын, тэрилтэ салайааччыларын кытта тэҥҥэ тыыннаах сибэкки дьөрбөтүн сэрии толоонугар геройдуу охтубут буойуттар сырдык кэриэстэригэр анаммыт памятникка уурдулар. “Чуораанчык “оҕо саадын тэрилтэтэ “Полевая кухня” саллаат хааһытын, итии хара чэйи, хара килиэби тэрийэн аахсыйа оҥордулар.
Түмүккэ кыһыл былаахтарынан “79” суругу таһааран үөһэттэн устуу түгэнэ ыытылынна.
“Туругурдун, Ытык Кыайыы күнэ” нэһилиэк ветераннарын күөх уот тула мунньан, итии чэйдээх, бырааһынньыктааҕы остуолу тэрийэн культурнай-спортивнай комплекс дьиэтигэр чиэстээһин сэргэхтик ыытылынна. Тыыл ветераннарыттан Елизавета Николаевна Владимирова, маны тэҥинэн сэрии кэмин оҕолоро, үлэ ветераннара кыттыыны ыллылар. “Сарыал” сынньалаҥ киин үлэһиттэрэ, оскуола үөрэнээччилэрэ ырыанан, үҥкүүнэн эҕэрдэлээтилэр.
Үгэс быһыытынан бары нэһилиэк тэрилтэлэрэ, бааһынай хаһаайыстыбалар тыыл бэтэрээннэригэр, сэрии кэмин оҕолоругар бородуукта нобуорун бэлэх ууннулар.
Екатерина Эверстова, Үөдэй пресс-киин