1 Хомустаах уонна Үөдэй нэһилиэктэрэ түөлбэлэрин олохтоохторун кытта ыкса ситимнээх үлэ ыыталлара биллэ көстөр.
Үөдэй орто оскуолатын коллектива тохсунньу 31 күнүгэр бэйэтин иһигэр сүүмэрдиир күрэхтэһии тэрийбит. Сүүмэрдэммит хамаанда улууска үөрэх тэрилтэлэрин икки ардыларыгар күрэхтэһэ айанныаҕа. Күрэхтэһиигэ 31 кыттааччы дартс, буулдьанан ытыы, корнхол көрүҥнэригэр бастыҥы быһаарсыбыттарын спортинструктор Екатерина Эверстова иһитиннэрэр.
Оттон олунньу ый саҕаланыыта, икки күн устата Улуу Кыайыы 80 сылыгар анаммыт күрэхтэһиигэ Үөдэй түөлбэлэриттэн барыта 120 киһи дартска, буулдьанан ытыыга, остуол тенниһигэр, саахыматка, волейболга күрэхтэспит.
“Күрэхтэһии олус диэн тыҥааһыннаахтык ааста. Нэһилиэккэ сэргэхсийии таҕыста, маассабай спорт көрүҥнэригэр дьон мустара кэҥээтэ. Онон, 3 күн устата Үөдэйбит 151 олохтооҕо спорт араас көрүҥнэригэр күрэхтэстэ”, – диир Екатерина Эверстова.
1-кы Хомустаахха түөлбэлэр икки ардыларыгар төрүт ох саанан ытыыга күрэхтэһии буолбут. 5 түөлбэттэн 12 киһилээх хамаанда кыттыыны ылбыт. Барыта 60 киһи күрэхтэспит – алын кылаас оҕотуттан аҕам саастааҕар тиийэ.
Төрүт ох саанан ытыыга хас биирдии кыттааччы үстүүтэ ыппыттарын спортинструктор Юрий Николаев иһитиннэрэр. Эрийсиилээх киирсии түмүгүнэн, 35 очукуолаах “Саһарҕа” түөлбэ кыайыы өрөгөйүн билбит. 22 очукуолаах “Кустук” 2-с миэстэ; бастакынан ытан 16 очукуону ылбыт “Чагда” 3-с миэстэҕэ тахсыбыт; оттон 16 очукуолаах “Үрдэл” 4-с миэстэ буолар; 8 очукуолаах “Дьулуур” 5-с миэстэ.
Кэлбит дьон төрүт ох саанан ытыы көрүҥүн интэриэһиргээбиттэрин уонна дьарыктанар баҕа санаалаахтарын биллэрбиттэр.
Харысхан Попов