Үөрэх хаачыстыбатын тупсарар пуорум тэрилиннэ

Тохсунньу 30 күнүгэр, Хатыҥ Арыы нэһилиэгэр Нам улууһун оҕо уһуйааннарын үлэһиттэрин уонна уопсай үөрэхтээһин оскуолаларын алын сүһүөх кылаастарын учууталларын «Оскуола иннинээҕи уонна алын сүһүөх үөрэх утумнааһына: ситимнээх үлэ уонна сайдыы кэрдииһэ» («Преемственность дошкольного и начального общего образования: траектория взаимодействия и развития») улуустааҕы пуорум ыытылынна.

Пуоруму Нам улуустааҕы үөрэх управлениета көҕүлээн, муниципальнай таһымҥа оҕо уһуйааныгар уонна оскуола алын сүһүөҕэр үөрэтии, иитии хаачыстыбатын үрдэтэр соруктаах тэрийдэ.

Манна улууспут 25 оскуолатыттан  алын сүһүөх кылаастарын 100 учуутала, 25 дириэктэри үөрэххэ, методическай, научнай үлэҕэ солбуйааччылар, 29 оҕо уһуйааныттан 80 педагог уонна Нам улуустааҕы үөрэх управлениетыттан начальник Мария Игнатьева, солбуйааччылара Светлана Поротова, Егор Бочонин, үөрэх управлениетын 11 специалистара кытыннылар.

Ону сэргэ ыҥырыылаах ыалдьыттар – «Нам улууһа» МТ баһылыга Юрий Слепцов, Дьокуускай куораттан СН. Донской-II аатынан  үөрэх үлэһиттэрин идэлэрин таһымын үрдэтэр, үөрэҕи сайыннарар институт салайааччылара, эппиэттээх үлэһиттэрэ, М.К. Аммосов аатынан ХИФУ педагогическай институтуттан, СӨ наукаларын кыра Академиятыттан, «Сайдыс» үөрэх кииниттэн, Дьокуускай куорат Н.И. Шарин аатынан 39 -дээх орто оскуолатын ресурснай кииниттэн, Хаҥалас улууһун М.Е. Николаев аатынан Өктөмнөөҕү научнай-үөрэтэр кииниттэн бэрэстэбиитэллэрэ кытыннылар. Барыта 200-тэн тахса киһи сырытта.

Хатыҥ Арыы нэһилиэгин «Чороон» НАК барбыт тэрээһинигэр Юрий Иннокентьевич аан тылы аһан, РФ Аҕа дойдуну, СӨ Ийэ дойдуну көмүскээччилэр, Нам улууһугар Кыайыы сыллара биллэриллибитинэн уонна Улуу Кыайыы 80 үбүлүөйдээх сылынан эҕэрдэлээн туран, үүнэр кэнчээри ыччаты төрөөбүт дойдуларын таптыырга, патриотическай тыыҥҥа иитэргэ олук охсор кыра саастаах оҕолор үөрэхтээһиннэрин утумнаан ыытарга ситиһиилээх үлэни, биир сомоҕо буолан, олох бары хайысхатыгар кыайыыларга тиийэри, туһалаах кэпсэтии тахсарын, көдьүүстээх быһаарыы ылылларын баҕарда.  

Пуорум мунньаҕар иһитиннэриилэри оҥордулар: М.С. Игнатьева, Нам улууһун үөрэҕин управлениетын начальнига, Н.И. Бугаев, СН. Донской-II аатынан үөрэх үлэһиттэрин идэлэрин таһымын үрдэтэр, үөрэҕи сайыннарар институт дириэктэрин солбуйааччы,  О.И. Михалева, С.Н. Донской-II аатынан үөрэх үлэһиттэрин идэлэрин таһымын үрдэтэр, үөрэҕи сайыннарар институт дириэктэрин үөрэххэ, методическай үлэҕэ солбуйааччы,  А.Н. Неустроева, М.К. Аммосов аатынан ХИФУ педагогическай институтун «Алын сүһүөх үөрэхтээһин» кафедратын сэбиэдиссэйэ,  Н.Г. Слепцова, И.Д. Винокуров-Чаҕылҕан аатынан Нам алын сүһүөх оскуолатын дириэктэрэ.

Пуорум кыттыылаахтара оскуола иннинээҕи саастаах, алын сүһүөх кылаастарын оҕолорун үөрэтиигэ араас таһымнаах программалар утумнаах буолууларын, психологическай адаптациялары, иитээччи уонна учуутал бииргэ алтыһар хайысхаларын, утумнааһын үөрэх хаачыстыбатын тупсарар өрүттэригэр дьайыытын, инновационнай үлэ бастыҥ уопутун туһаныыны, оскуола иннинээҕи уонна начальнай үөрэхтээһиҥҥэ ааҕыы грамотатын тупсарыыны о.д.а. туһаайыылары дьүүллэстилэр, санааларын атастастылар.

Ол кэнниттэн пуорум кыттыылаахтара И.Е. Винокуров аатынан Хатыҥ Арыы орто оскуолатыгар секцияларынан научнай-практическай, методическай семинардарга, практика семинардарыгар, дискуссионнай былаһааккаларга үлэлээтилэр. Алта бөлөҕүнэн тэриллибит маастар-кылаастарга интэриэһинэй, сонун үлэлэри көрдүлэр, бастыҥ үлэ уопутун билистилэр, сэҥээрдилэр.

Түмүгэр улуустааҕы пуорум кыттыылаахтара оҕо уһуйаанын иитиллээччилэрин уонна оскуолалар алын сүһүөх кылаастарын оҕолорун үөрэтиигэ утуму сайыннарыыга, бөҕөргөтүүгэ, уһуйааччылар, учууталлар үөрэх аныгы ирдэбиллэригэр эппиэттиир, ситимнээх үөрэх хаачыстыбатын үрдэтэр элбэх пууннаах уурааҕы ылыннылар.

Ольга Михалева, үөрэх үлэһиттэрин идэлэрин таһымын үрдэтэр, үөрэҕи сайыннарар институт үөрэх чааһыгар дириэктэри солбуйааччы

Касьян Олесов-Олук

 

Читайте дальше