«Чэгиэн» рубрикаҕа ааҕааччыбыт ыйытар: «Тымныйан тумуулуу сылдьабын, дьиэбэр эмп-томп суох. Эмтэниигэ тугу сүбэлиигитий? Ыарыыбын хайдах намыратабын?»
Екатерина Бубякина, Нам улуустааҕы киин балыыһа поликлиникатын сэбиэдиссэйэ:
-Тымныйыы саамай тарҕаммыт ыарыыларынан грипп, коронавирус инфекцията уонна да атын ОРВИ-лар буолаллар. Тымныйыыны сэрэтэр саамай эрэллээх уонна көдьүүстээх ньыманан быһыыны ылыы (вакцинация) буолар. Быһыыны эпидемия кэмэ саҕаланыан иннинэ, атырдьах ыйыттан сэтинньигэ диэри, ылыахха наада. Тоҕо диэтэххэ, грипп уонна ОРВИ халлаан тымныйыыта, үгэс курдук, күһүҥҥү-кыһыҥҥы кэмҥэ күүскэ тарҕанар.
Сыл аайы вирус уларыйа сылдьар, эбэтэр саҥа көрүҥэ тарҕанар. Ол иһин быһыыны сыллата ыларга сүбэлиибит. Быһыы эпидемия кэмигэр саамай актыыбынай вирустартан көмүскүүр. Быһыыны ылбыт киһи тымныйыы ыарыыларыгар мээнэ хаптарбат, эбэтэр ыарыыны дириҥэппэккэ, чэпчэкитик аһардар. Оттон быһыыны ылбыт кэннэ, сыл бүтүүтэ грипптэн иммунитет мөлтүүр.
Быһыыны кыайан ылбатаххына, анал көмүскэнэр миэрэлэри туһаныахха наада. Онно киирсэр: сөбүгэр үлэ, сынньалаҥ, утуйуу эрэсиимин тутуһуу, толору аһылык, тиһигин быспакка эт-сиин хамсаныытын оҥоруу, табахтан, арыгыттан аккаастаныы, наркотическай препараттары туттубат буолуу, дьиэни-уоту салгылатыы, кэмиттэн кэмигэр сииктээх быыллааһыны оҥоруу. Ону тэҥэ ыалдьыбыт дьону кытта алтыһыыттан туттунуохха, дьон тоҕуоруһар миэстэлэригэр, уопсастыбаннай транспорка сылдьыы бириэмэтин аччатыыхха, маасканы кэтиэххэ уонна суунар средстволары туттан кичэллээхтик илиини сууйа сылдьыахха наада.
Касьян Олесов-Олук
Редакцияттан: ааҕааччыларбытыттан 89241711152 сот. эбэтэр ensieli@mail.ru эл.почтаҕа ыйытыыларгытын күүтэбит.