И.Д. Винокуров-Чаҕылҕан аат. алын сүһүөх оскуолата «КЭС» диэн бырайыак оҥордо. «КЭС» — «Кэриэстиир Эбээһинэһи Сүгүөххэ» — сиэр-майгы, гражданскай-патриотическай иитии бырайыага алын сүһүөх кылаас үөрэнээччилэриттэн саҕалаан, төрөппүттэри, педагогтары барыларын хабыаҕа.
Бу киэҥ хабааннаах бырайыак логотибын дизайнын оскуола педагог-библиотекара А.С. Андреева оҥорбут. Оттон логотип автордарынан Айсен Робертович, Анисия Эдуардовна 2 «б» кылаас үөрэнээччитэ Нарыйа Васильева дьиэ кэргэнэ буолаллар.
Тохсунньу 27 күнүгэр, Ленинград куорат блокадаттан босхоломмут күнүгэр, дойдуга Аҕа дойдуну көмүскээччи, өрөспүүбүлүкэҕэ Ийэ дойдуну көмүскээччи, улууспутугар Кыайыы сылларын оскуолаҕа арыйыы бэлиэ түгэнигэр «КЭС» (Кэриэстиир Эбээһинэһи Сүгүөххэ) бырайыак саҕаламмыта биллэриллибитэ.
Сыл устата, былаан быһыытынан, кылаас чаастара, кэриэстэбил уруоктара, киинэ уруоктар, акциялар, экскурсиялар, бэсиэдэлэр, быыстапкалар, научнай-чинчийэр үлэлэр, литературнай-уус-уран туруоруулар, байыаннай ырыа фестивала ыытыллыахтара.
Биһирэмнээх ыалдьыттарга бэлэх быһыытынан, бырайыак саамай көхтөөх кыттааччыта Васильева Нарыйа авторскай аккырыыкката, остуол халандаара, магниттаах закладка таҕыстылар. Маны тэҥэ уруһуй куонкуруһа, аккырыыккалар уо.д.а. бэчээт бородууксуйата былааннанар.
Үөрэнээччилэр төрөппүттэри уонна учууталлары кытта «Кыайыы сиэннэрэ», «Уголок КЭС», «Альбом КЭС» оскуола бырайыактарыгар уонна дойду, өрөспүүбүлүкэ, улуус таһымнаах тэрээһиннэргэ билиилэрин-көрүүлэрин таһымын тургутуохтара, кэҥэтиэхтэрэ.
«Кэриэстиир Эбээһинэһи Сүгүөххэ» бырайыак сүрүн чааһынан «Движение Первых» хамсааһын олохтоох отделениетын кытта оҥоһуллубут «Дневник Великой Победы» бырайыак буолар. Манна оҕолор ыытыллыбыт тэрээһиннэр, уруоктар, кылаас чаастар тустарынан санааларын суруйуохтара.
Оскуола бары кылаастарыгар «Кыайыы сиэннэрэ» диэн бырайыак саҕаланна. Хас сэрэдэ ахсын үөрэнээччи кылааһын иннигэр Аҕа дойду Улуу сэриитигэр кыттыбыт аймаҕын туһунан дакылаат ааҕар. Бу түмүгүнэн КЭС» муннуктара тэриллиэхтэрэ.
«Эҥсиэли» хаһыат