Суоппар идэтэ олус уустук уонна элбэх сыраны, күүһү эрэйэр. Аппааны бөһүөлэгин олохтооҕо Сивцев Герасим Поселовичка ыалдьыттаатым.
Герасим Поселович олунньу 7 күнүгэр 1960 сыллаахха Евдокия Герасимовна уонна Посел Титович Сивцевтарга үһүс оҕонон күн сирин көрбүт. Ийэлээх, аҕата 11 оҕону күн сирин көрдөрөн улаатыннарбыттар. Хатыҥ Арыы нэһилиэгэр Евдокия Герасимовна “Герой Ийэ” буолар. Аҕата кадровай булчут, кэлин суоппар идэтин баһылаан райпо суоппара этэ. Техникаҕа сыстаҕас буолан, наар массыына өрүмүөннүүрэ, элбэх киһи кэлэн массыына оҥотторор этэ.
-Мин 10-12 саастаахпар аҕабар массыына оҥороругар күлүүс биэрээччинэн, кэлин бэйэм көмөлөһөр буолбутум. Оҕо сылдьан ГАЗ-63 массыынаҕа олуһун ымсыырарым, кэлин сааһыран бараммын бэйэм дьонтон ГАЗ-63 атыылаһаммын, оҥостоммун, билигин сайынын сүүрдэбин, оҕо сааспын санатарыттан олуһун долгуйабын…
Герасим Поселович бэйэтин үлэтин туһунан маннык кэпсиир:
—1979 с. Хатыҥ Арыы орто оскуолатын бүтэрэн, Дьокуускайга автошколаҕа алта ыйдаах суоппар курсугар үөрэнэ киирбитим. Курсу бүтэрэн баран Хатыҥ Арыы совхозка ГАЗ-53 эргэ массыынаны оҥостон суоппардаабытым. Салгыы совхоз директорыгар С.С. Алексеевка бортовой УАЗ-ка сылы кыайбат суоппардаабытым. 1983 с. саҥа ГАЗ-53 массыына биэрэллэр, онно үлэлиир кэммэр оройуон чемпионун үрдүк аатын ылбытым.
1984 с. ЗИЛ эргэ массыынаҕа үлэлии сылдьан иккитэ нэһилиэк чемпиона буолбутум. 1987 с. ЗИЛ ММЗ-554 саҥа массыына биэрэллэр онно Зырянкаттан, Невертэн таһаҕас тиэйэммин оройуон чемпиона буолбутум. 90-с сылларга, совхоз эстиитигэр, В.В. Эверстов бааһынай хаһаайыстыбатыгар үлэлээбитим, салгыы чааһынай газель массыына атыылаһаммын дьону, таһаҕас тиэйэрим. Кангаластан оттук чох, Золотинкаттан комбикорм, совхоз иһигэр кумах, гравий, швырок тиэйэрим. Покровскайтан кирпииччэ, цемент, куораттан тутуу материалын аҕаларым, лесовозка үлэлиир кэммэр мас тиэйэрим.
Онтон 2014 сылтан “Эрэл” ТХПК-ҕа күн бүгүҥҥэ диэри водовозкаҕа үлэлиибин. Молокозаводка Модукка, Партизаҥҥа, Аппааныга, Никольскайга, 1 Хомустаахха уу кутабын. 2017 с. “Лучший водитель СХПК” анал ааты ылбытым. Суоппар идэтин баһылаан, илиибиттэн массыына уруулун ыыппатаҕым номнуо 43 сыл буолла.
Герасим Поселович суоппардыыр кэмигэр сүбэһит, бииргэ алтыһан үлэлэспит суоппар доҕотторунан буолбуттара: Иван Гоголев, Иван Доромонов, Василий Игнатьев, Дмитрий Петренюк, Егор Марков, Валерий Павлов о.д.а.
Герасим кэргэнэ Евдокия Григорьевналыын икки кыыс оҕоҕо күн сирин көрдөрбүттэр. Евдокия оскуола интернатыгар тех. үлэһит, улахан кыыс Гелена 10 кылааска, кыра кыыс Милена 8 кылааска И.Е. Винокуров аатынан Хатыҥ Арыы орто оскуолатыгар үөрэнэллэр. Сивцевтар дьиэ кэргэн 15 хороҕор муостааҕы иитэллэр, сайынын оттууллар, сир астыыллар.
Билиҥҥи олоххо массыыналар – барыта электроннай, омук техникалара. Былыр барыта карбюратор этэ, онон оҥосторго уустуктардааҕа. Эдэр ыччат үлэттэн толлубакка эрэ, ханнык баҕар үлэҕэ харса суох инникигит диэки ылсан үлэлээҥ, – диэн Герасим Поселович эдэр суоппардарга илдьитин тиэртэ.
Надежда СИВЦЕВА