Бүгүн Аан дойдуга Хореограф күнэ бэлиэтэнэр. Бу ураты кэрэ эйгэлээх Терпсихора абылаҥар ылларбыт хореографтартан хамаҕатталар тумус туттар киһибитинэн СӨ култууратын үтүөлээх үлэһитэ Любовь Андросова буолар. Кини «Радуга» оҕо үҥкүү ансаамбылыттан саҕалаан «Ретро-Данс» народнай коллектив салайааччытынан үлэлээн элбэх да үҥкүүнү туруорда, үҥкүү «тылынан» үтүөҕэ сирдээтэ! Онтон тугу сүрэҕэр сөҥөрдөн, санаатын далыгар үтүө өйдөбүл оҥостон илдьэ сылдьарыттан билсиэҕиҥ:
— Бэйэбэр сөптөөх таптыыр идэбин таба талан, идэ оҥостон үөрэ-көтө үлэлээн кэлбиппиттэн дьылҕабар махтанабын.
Ордук «Комсомольскай» совхоз эрдэҕинээҕи кэмнэри ахта саныыбын. Дьон барыта ньиргиччи үлэлии-хамсыы сылдьара, кулуупка кыттыылара эмиэ күргүөмүнэн буолара. Бастаан нэһилиэк тэрилтэлэрин икки ардыгар, онтон нэһилиэктэр кэнсиэрдэрэ, ол кэнниттэн күүстээх нүөмэрдэри талан совхозтар улахан кэнсиэрдэрэ буолара. Саамай ол кэмнээҕи сүүрэ-көтө, ыксыы, долгуйа сылдьарбын санаан астынабын.
Хамаҕатта дьоно-сэргэтэ үҥкүүнү ордук чорботон сөбүлүүрүн, дууһатыгар чугас тутарын билэбин, онтон үөрэбин уонна ону ыһыктыбакка сүрэхтэригэр чугас тута сылдьыахтарын баҕарабын. Үөрэппит оҕолорум эмиэ хореограф идэтин талан үлэлии сылдьалларыттан сэмээр үөрэбин, кинилэри эҕэрдэлиибин уонна ситиһиини баҕарабын.
Үүммүт Айыыһыт Хотун сыла, Любовь Алексеевна бэйэтэ төрөөбүт сыла, үтүөнү тосхойдун, кини үҥкүүһүттэрэ ытыс дохсун тыаһынан кэрэни үксэтэ сыанаҕа тахса турдуннар!
Мария Винокурова