М.К. Аммосов аатынан дыбарыаска тохсунньу 14 күнүгэр 7-с төгүлүн ыытыллар “Саҥа сылга – Саҥа ааттар” бырайыак ситиһиилээхтик ааста.
Нам улууһугар “Саҥа сылга – Саҥа ааттар” бырайыагы олоххо СӨ култууратын туйгуна, “Эҥсиэли Хотуттара”, “Ил Куо”, “Алгыс” вокальнай ансаамбыллар салайааччылара, П.П. Ядрихинскай-Бэдьээлэ аатынан Намнааҕы Олоҥхо дьиэтин хормейстера Ирина Неустроева буолар.
Быйылгы “Саҥа сылга – Саҥа ааттар” күрэххэ Таастаахтан, Салбаҥтан, Партизантан, 1-кы Хомустаахтан уонна Ленскэй нэһилиэктэн баҕалаахтар бэйэлэрин сөбүлүүр ырыаларын толорбуттар.
Буоларын курдук, ырыаҕа саҥа ааттары билээри, куоластары истээри дыбарыаска көрөөччү дьон тоҕуоруһа мустубут. Быйылгы күрэххэ улахан сыанаҕа барыта 17 кыттааччы бэйэтин көрдөрбүт, тахсыбыт. Чуолан эттэххэ, бырайыак ырыа эйгэтигэр, элбэх киһилээх саалаҕа маҥнайгытын тахсааччыга, холонооччуга уонна кыттыыны ылааччыга туһуланар. Бырайыакка кыттыыны ылан баҕа санааны толороллор, инникитин дьон ортотугар сылдьарга эрэл ылаллар.
Эдэрдэргэ кыайыы өрөгөйүн, кэрэ куоластаахтарынан Арылхай Данилова, 50-тэн үөһэ саастаахтарга Гран-При үрдүк аатын Зоя Христофорова сүкпүттэр, ааттаммыттар. Көрөөччү биһирэбилин Салбаҥ ырыаһыта Зинаида Сивцева ылан үөрүүтэ үксээбит.
“Быйылгы бырайыакка дьүүллүүр сүбэҕэ Саха сирин эстрадатын сулустара үлэлээтилэр: СӨ култууратын үтүөлээх артыыстара Екатерина Саввинова- Саина, Валентина Романова-Чыскыырай, Варя Аманатова-Алаас Кыыһа уонна Саха фольклорун сүрүннүүр специалиһа Варвара Обоюкова.
Кыттыбыт дьоммор, көрөөччүлэрбэр уонна СӨ култууратын туйгуна Вера Колпашникова салайааччылаах Олоҥхом дьиэтин коллективыгар махталым муҥура суох. Дьону кынаттыыр, киэҥ эйгэҕэ таһаарар эһиилги “Саҥа ааттар” ырыа күрэҕэр көрсүөххэ диэри”, – диэн баҕа санаатын үллэстэр бырайыак ааптара Ирина Неустроева.
