Улууспутугар биллэриллибит Оҕо спордун сылын түмүктээн, «Байанай» ыйынан уонна «Олоҥхо» декадатын чэрчитинэн сэтинньи 22 күнүгэр «Үс ситим» күрэхпит иккис түһүмэҕэ — «Хабылык» күрэҕэ буолан ааспыта. Манна Нам улууһун сахалыы остуол оонньууларын Федерациятын чилиэнэ А.А. Николаева оҕолорго «Хабылык» быраабылатын кэпсээтэ уонна маастар кылаас ыытта. Оҕолор сэҥээрдилэр, дьарыктаныахтарын баҕаралларын эттилэр.
Бүгүн спортсаалаҕа сахалыы оонньуулар буоллулар. Партизан «Айылгы» орто оскуолатын орто, алын сүһүөх оҕолорун уонна «Кустук» оҕо уһуйааммыт иитиллээччилэрин «Үс ситим» күрэҕэ түмүктэннэ.
Бу тэрээһиҥҥэ спонсордаабыт нэһилиэкпит дьаһалтатын, «Айылгы» орто оскуолатын, «Кустук» оҕо уһуйаанын тэрилтэлэригэр уонна тэрээһиммитигэр көхтөөхтүк кыттыбыт тэрилтэлэрбитигэр истиҥник махтанабыт.
Полина Скрябина