Ленскэй нэһилиэк олохтоох дьаһалтатын үлэһиттэрэ, Саха сиринээҕи ветеринария управлениетын судаарыстыбаннай инспектора Павел Николаев, полиция участковайа Нам сэлиэнньэтин уулуссаларыгар босхо сылдьар ыттарга рейдэ үлэтин ыыттылар.
Сэлиэнньэ хоту уонна соҕуруу өттүгэр ыт хото мустар эбит диир буоллахтарына, ыт үөргэ холбоһон мустара харахха быраҕыллар гына биллэ аччаабыт. Оччотугар дьиэлээх хаһаайыттар өрө тардынан ыттарын баайыыга туруорбуттар диэҕи баҕарыллар. Бэлиэтээн эттэххэ, дьиэ кыыла оҕону оскуолаҕа батыһан кэлэрэ эмиэ намтаабыт курдук. Бу харах көрүүтүн оҕо кэпсээнэ, көрбүтэ туоһулуур. Ити курдук, олохтоохтор бу былааҥканы түһэрбэккэ, дьиэ кыылыгар эппиэтинэстээхтик сыһыаннаһаргыт ирдэнэр!
Арай, биирдиилээн көрдөххө, Степан Платонов аатынан уулусса хоту өттүттэн саҕаланыыта, баайыыга сылдьыбат ыт ким ыта буолара биллибэккэ хаалла. Салгыы, Кытыл уулуссаҕа босхо ыт сылдьарыгар тохтоотубут. Дьиэҕэ ким да суох буолан бу быһыыны-майгыны быһаарар уустук. Ол эрээри, анал баайыыга турар сирдээҕэ, көрүүгэ-истиигэ сылдьара көстөр. Аны Нэлэгэр түөлбэ уулуссаларыгар хайдах эбитий ыт босхо барыыта? Намская уулуссаҕа икки маҥан ыт дьиэлэрин таһыгар босхо сылдьаллар.
Хаһаайыттар ыттаргытын төһө да дьиэлэрин таһыгар сырытталлар, ханна да барбат, дьону куттаабат диэтэргит, өйдүөххэ наада: куттанар, омуннаах араас майгылаах улахан дьон, оҕо ааһарын. Онон өссө биирдэ, тоһоҕолоон “эйиэнэ, миэнэ, киниэнэ, ааһа бара туруҥ, тугун кыһалҕатай онно” диэни тыллары таһаарары тохтоторго!
Ыты кытта ситимнээх өрөспүүбүлүкэҕэ буолбут түбэлтэ кэнниттэн ирдэбил күүһүрэр, кытаатар! Бары сөптөөхтүк өйдөөн, биир тылы булууга тиийиэхтээхпит. Холобура, эн биһикки өйдөспөтөхпүтүттэн атыттар эчэйиэхтэрин сөп. Оннук тахсымыан уонна буолумуон наада, булгуччу!
Харысхан Попов