Ыттары туталлар, сохсолор тураллар – ыт аҕыйаабат

Нам сэлиэнньэтигэр көрүүтэ-истиитэ суох бэйдиэ сылдьар ыттары тутуу үлэтэ салҕанар. Ол курдук, ыты тутар Намнааҕы приют үлэҕэ киириэҕиттэн дьиэ кыылын тутуу-хабыы өссө күүһүрбүтэ.

Уопсастыбаннай сирдэргэ ыты тутуу, элбэх сохсо турбутун да үрдүнэн, сэлиэнньэҕэ ыт мэнээктээһинэ лаппа аҕыйаата, уулуссаҕа тахсара аччаата дииртэн туттунаҕын. Ону приют салайааччыта Василий Крымков да бигэргэтэр. Өссө биирдэ, бу ыттар үксүлэрэ хаһаайыннаах буолаллара биллэр.

Киһи ыстарааптаннаҕына, миэрэҕэ тардылыннаҕына эрэ долоҕойугар түһэрэр. Хаһааҥҥы диэри оннук буоларын күүтэн олоробут?! Эрдэтинэ сөптөөх миэрэлэри ыллахпытына, барыбытыгар туһалаах буоларын толкуйдуур кэм кэллэ! Бэйэ-бэйэни убаастаһар киин сиргэ олороргун умнума!

2024 сылтан 18 ыт баар эбит. Бэйдиэ сылдьар ыттары бэрээдэктиир бөлөх 2025 сыл саҕаланыаҕыттан тохсунньу 15 күнүгэр диэри Нам сэлиэнньэтин уулуссаларыттан 5 көҥүл сылдьар ыты туппут.

Бүгүҥҥү күҥҥэ 2 ыты хаһаайыттара ылбыт. 1 ыт оҕото саҥа хаһаайыннаммыт. Билигин приюкка 20 ыт, ол иһигэр 3 ыт оҕото баар.

Харысхан Попов

Читайте дальше