Нам сэлиэнньэтигэр ыт мэнээктээһинэ аҕыйыахтааҕар элбии турар. Хаһаайыттар ыттарын соруйан ыыталлар дуо?! Диэххэ айылаах хартыына буолла.
Дьиэ кыыла уулуссаҕа тахсаары, уопсастыбаннай сирдэргэ дьону куттаары иитиллибэт. Элбэх ыт мустара оскуолаларга, тэрилтэлэргэ бэлиэтэнэр. Саҥа 2025 сылга үктэнэн баран, Нам сэлиэнньэтигэр, номнуо, 6 киһи административнай миэрэҕэ тардыллыбытын Саха сиринээҕи ветеринария управлениетын судаарыстыбаннай инспектора Павел Николаев бигэргэтэр. Онон кытаанах тутуу-хабыы, ыстараап үлэтэ күүһүрүөҕэ.
“Ыстараап СӨ административнай буруйу кэһиилэрин кодексатын 5.4 ыст. 1-кы чааһынан ыт хаһаайына 1-3 тыһ. диэри ыстарааптанар; маннык иккистээн хатыланан түбэһэр түгэнигэр, ыт хаһаайына 5.4 ыст. 2-с чааһынан 3-5 тыһ. диэри ыстарааптанар.
Дьиэ кыыла киһини ытырбыт буоллаҕына, РФ административнай буруйу кэһиилэрин кодексатын 8.52 ыст. 3-с чааһынан, ыт хаһаайына 10-30 тыһ. диэри ыстарааптанар”, – диэн этэр Павел Васильевич.
Василий Крымков биригээдэтэ бүгүн 7 ыты тутта. Мантан 5-һэ моойторуктаах. Аны туран, ыттары сохсолортон босхолоомоҥ! Бүгүн Чернышевскай аатынан уул. элбэх квартиралаах дьиэлэргэ турбут сохсоҕо биир хаайтарбыт ыты уонна оскуола аттыгар баартан эмиэ биир ыты көҥүлгэ таһаарбыттар.
Хаһаайыттар! Дьиэ кыылларын көрүүтэ-истиитэ суох көҥүл ыытымаҥ уонна сохсолору олох тыытымаҥ!
Василий Крымков биригээдэтигэр эрийэн тиийэргэ билсэр нүөмэргит: 8 9-14-301-21-27.
Харысхан Попов