Искра нэһилиэгин ыаллара, түөрт оҕолоох, кэтэх хаһаайыстыбалаах Александра, Данил Дьяконовтар уоллара Дамирга улахан ыалдьыттар кэлэн бардылар.
Ол курдук, фермер, ыччат политикатын лидерэ Ньургун Габышев, «Хаҥалас Агрохолдинг» председателэ, Ил Түмэн депутата Тихон Скрябин Дамирга СӨ ыччат правительствотын председателэ С.И. Иванов Махтал суругун туттардылар.
Уол тыа хаһаайыстыбатыгар кырачаан сааһыттан сыстан, дьонугар көмөлөһөн элбэх оҕоҕо холобур буолар. Хотоҥҥо үлэлии сылдьар видеота социальнай ситимнэргэ күүскэ тарҕанан дьон-сэргэ сэҥээриитин ылбыта, сөхтөрбүтэ, сөбүлэппитэ. Бу үтүө дьарыгын, үлэһит майгытын хайҕаан, Намын улууһун аатын инникитин да ааттата турдун диэн сыаналаах бэлэх айфон — 14 туттардылар.
Дамир биһиэхэ өссө эдэр артыыс быһыытынан биллэр. Кини былырыын «Сахабэчээт» судаарыстыбаннай тэрилтэ Ulus.Media редакцията фронтовик-суруйааччы Тимофей Сметанин «Мэхээлэчээн булчут кэпсээннэрэ» сэһэнинэн киинэтигэр сүрүн оруолга уһуллубута. Уолчаан бастакы оруолугар ылсан, итэҕэтиилээхтик арыллан оонньообута. Киинэни эһиил күүтэбит.
«Эҥсиэли» хаһыат