Нам улууһун Партизан, Хамаҕатта нэһилиэктэригэр Хатастааҕы сибиинньэни иитэр комплекстан халаан уутуттан эмсэҕэлээбит ыалларга көмөнү оҥорон, босхо сибиинньэ оҕолорун аҕалан тарҕаттылар.
Ол туһунан Партизан нэһилиэгин дьаһалтатын тыа хаһаайыстыбатын специалиһа Юлия Федорова иһитиннэрэр:
-Партизан нэһилиэгэр халаан уутуттан эмсэҕэлээбит Хатастааҕы сибиинньэ иитэр комплекс көмө оҥорон 9 ыалга уопсайа 1,5-2 ыйдаах 15 төбө сибиинньэ оҕолорун аҕаллылар.
Хамаҕаттаҕа халаан уутуттан эмсэҕэлээбит 4 ыалга уопсайа 8 сибиинньэ бэриллибит.
Халаан уута Нам улууһугар үгүс хоромньуну таһаарбыта. Ууга барбыт ыаллар улахан кыһалҕаны көрсөн тупсарыныы, өрөмүөн, чөлүгэр түһэрии үлэтин билигин да ыыта сылдьаллар. Үтүө санаалаах дьоммутуттан тиһигин быспакка өрөспүүбүлүкэбит ыраах-чугас улуустарыттан, тэрилтэлэриттэн, бааһынай хаһаайыстыбалартан көмө кэлэ турар. Үтүө санаа – сыаналаммат кылаат!
Касьян Олесов – Олук