Хомустаах Бастакы нэһилиэк туонатыгар олунньу 28 күнүгэр 2023 «Алгыс» норуот айымньытын киинигэр сылы түмүктүүр үөрүүлээх тэрээһин буолан ааста.
Ааспыт 2023 сыл түмүгүнэн бастыҥтан бастыҥнары бэлиэтиир үөрүүлээх тэрээһин бэрт сэргэхтик уонна хаһааҥҥытааҕар да уратытык барда. Тэрээһин саҕаланыыта кэскили түстүүр, баай байылыат олоҕу тосхойор Ытык Дуоҕаны Хомустаах 1-кы нэһилиэгин аҕа баһылыгар Василий Жирковка, «Эр сомоҕо» нэһилиэк аҕаларын, эр дьонун түмсүүтүн салайар Александр Захаров туттарда. Бу кэнниттэн, тэрилтэлэр парааттара саҕаланна. Ааспыт 2023 сыл түмүгүнэн нэһиэлиэк туруу үлэһит дьоно үлэ тэрилтэлэрэ салайааччыларын кытта парадтаан киириитэ буолла. Кырдьык да көрөөччүлэргэ, кэлбит ыҥырыылаах ыалдьыттарга бэрт сонун уонна ураты көстүү буолла. Ол курдук барыта 16 тэрилтэ үөрүү өрөгөйдөөх салайааччыларын кытта хааман аастылар.
Ханна баҕар буоларын курдук үрдүк сыанаттан, дохсун ытыс таһыныылаах нэһилиэк үлэһит дьоно наҕараадаланнылар. Ол курдук, «Хомустаах 1-кы нэһилиэгин Ытык Киһитэ» бэлиэнэн:
- Азарова Анастасия Афанасьевна
- Сергучева Варвара Михайловна
- Соловьева Анастасия Степановна
«Хомустаах Бастакы Нэһилиэккэ кылаатын иһин»
- Егорова Розалия Тимофеевна
- Егоров Иван Иванович
- Колесов Дмитрий Иннокентьевич
- Ядреев Афанасий Васильевич
- Посельская Мария Петровна
- Ядреева Галина Петровна
«Почта России» акционернай общество номинациятын, хаһыат сурутуутугар уонна Нам улууһугар Бастыҥ почтальон аатын Ядреев Афанасий Васильевич ылла.
Күүтүүлээх ыалдьытынан СӨ Ил Түмэн мунньаҕын дьокутаата Александр Атласов биир дойдулаахтарыгар үлэ-хамнас туһунан санаатын, эҕэрдэтин тириэртэ уонна СӨ Ил Түмэн Бэрэссэдээтэлин Бочуоттаах грамотатын Хомустаах Бастакы нэһилиэгин тыа хаһаайыстыбатын үлэһиттэригэр туттарда.
Нэһилиэк 2023 сыл түмүгүнэн үөрэххэ, үлэ араас хайысхатыгар бастыӊтан бастыӊнары ааттаатылар.
«Бастыҥ үөрэнээччи-2023» — Лев Заболоцкай, Д.Ф.Алексеев аатынан 1-Хомустаах орто оскуолатын 11 кылаас үөрэнээччитэ.
«Бастыҥ студент-2023» — Евгений Новгородов М. К. Аммосов аатынан ХИФУ естественнай наукаларын институтун 5 курсун устудьуона.
«Бастыҥ общественнай түмсүү-2023» — Александ Захаров, «Эр сомоҕо» нэһилиэк эр дьонун түмсүүтүн салайааччыта.
«Бастыҥ тэрилтэ-2023» — «Мичийээнэ» оҕо уһуйаана, сэбиэдиссэй Елена Табунанова.
«Быйаҥ — 2023» — номинация туттарыллар бааһынай хаһаайыстыба салайааччыта Айдын Аргунов.
«Бастыҥ ааҕааччы — 2023» -Александра Васильева, Д. Ф. Алексеев аатынан 1-Хомустаах орто оскуолатын нуучча тылын уонна литературатын учуутала.
«Бастыҥ спортсмен — 2023» — Максим Охлопков, Нам улууһун хапсаҕайга чемпиона, мас тардыһыы, саха многоборьетын призера.
«Бастын специалист — 2023» — Дьулустан Софронов, «Сайдыы» оҕо айымньытын дьиэтин педагога.
«Сонун сүүрээн — 2023» — Станислав Соловьев, Баһылай Манчаары аатынан национальнай спорт киинин тренерэ, тарбах тардыһыы тренажер ааптара.
«Үтүө санаа-2023» — Алексей Пинигин, «Прогресс» хааччахтаммыт эппиэтинэстээх тэрилтэ генеральнай директора.
«Ытык ыал-2023» — Варвара, Федор Новгородовтар, педагогическай үлэ бэтэрээннэрэ.
«Аҕа сылын бастыҥа — 2023» — Юрий Николаев, нэһилиэк депутаттарын бэрэссэдээтэлэ, общественнай олох көхтөөх кыттыылааҕа.
Ааспыт 2023 сылга дойдубут үрдүнэн биллэриллибит «Педагог уонна наставник сылынан» анал номинациялар спорт хамсааһыныгар үрдүк ситиһиилээх ветераннарга, ыччакка уонна общественнай хамсааһын салайааччыларыгар ананнылар.
Утуму удьуордаан, көлүөнэнэн биир идэни баһылаан, нэһилиэк олоҕо сайдарын туһугар үлэлиир-хамсыыр, үгүс дьоҥҥо үтүө холобур буолар дьиэ кэргэттэрэ наҕараадаланнылар.
Байыаннай дьайыыга сырдык тыынын уурбут Евгений Терентьев дьиэ кэргэнин аатыттан, кини сырдык аатын үйэтитэн нэһилиэк спортивнай хамаандатыгар күрэхтэргэ кэтэр биир өҥнөөх форма туттардылар.
Лена Корякина