Саха АССР министрдэрин сэбиэтин 464 №-дээх от ыйын 22 күнүн 1960 сыллаах уурааҕынан, алтынньы 1 күнүттэн Намнааҕы оҕо музыкальнай оскуолата аһыллан үлэтин саҕалаабыта.
Ыччаты музыка кэрэ эйгэтигэр үөрэтии, уһуйуу курдук улахан суолталаах, кэскиллээх дьыаланы маҥнайгы дириэктэр — ССРС культуратын туйгуна, самодеятельнай композитор Иван Афанасьевич Бубякин, преподаватель Владимир Павлович Новгородов фортепиано уонна баян кылаастарыгар 32 үөрэнээччилээх саҕалаабыттар.
1969 с. духовой инструменнар кылаастара аһыллан, учуутал Ю.Н. Попов таһаарыылаахтык үлэлиир. 1978 с. струнно-щипковой кылааһы СР культуратын туйгуна Р.В. Дьяконова салайар уонна 1978 сыллаахха скрипичнай кылаас аһыллар, манна преподавателлэринэн Т.П. Зубкова, И.П. Петрова үлэлииллэр. Дьэ, уонна 1979 сылтан, баар инструменнарынан кэнсиэрдэргэ бииргэ оонньоон, оркестр быhыытынан үлэни саҕалыыллар.
З.П. Винокуров аатынан Оҕо искусствотын оскуолатын норуот инструменнарын оркестрын күн бүгүнүгэр диэри Анна Федулова иилээн-саҕалаан салайар.
Республика үрдүнэн бүгүҥҥү күҥҥэ 64 Оҕо искусствотын оскуолата үлэлиир буоллаҕына, З.П. Винокуров аатынан Намнааҕы оҕо искусствотын оскуолата 5 иһигэр киирэр бастыҥ оскуола буолар. Нам сэлиэнньэтигэр 270 оҕо араас көрүҥнэргэ үөрэнэллэр, онтон улуус үрдүнэн филиалларынан 745 оҕо искусство эйгэтигэр уһуйуллар.
З.П. Винокуров аатынан Оҕо искусствотын оскуолатын преподавателлэрин оркестра тэриллибитэ 45 сыллаах үбүлүөйдээх кэнсиэрин СӨ Ил Түмэн мунньаҕын бэрэссэдээтэлэ Алексей Еремеев аста. Кини үөрэммит музыкальнай оскуолатын эҕэрдэлээтэ уонна сылаас, истиҥ тылларынан ахтыы оҥорон көрөөччүлэри интэриэһиргэттэ.
Оркестр доҕуhуолунан биир дойдулаахтарбыт, көмүс куоластаах республикабыт биллэр-көстөр ырыаһыттара, киэн туттар дьоммут: СӨ норуодунай артыыһа Александр Емельянов, СӨ норуодунай артыыската Анегина Дьяконова, СӨ культуратын туйгуна Алена Яковлева – Анна-Дива, М. Глинка аатынан Новосибирскайдааҕы консерватория магистрана, Аан дойдутааҕы, Россия күрэхтэрин лауреата Степан Захаров баяҥҥа оонньоон, көрөөччүлэр интэриэстэрин тартылар. Ону тэҥэ, биир дойдулаахпыт Дмитрий Барабанов “Умнуллубат кустук” ырыатынан мустубут дьону эҕэрдэлээтэ. Саҥа тахсан эрэр ырыаһыт, Бөтүҥ орто оскуолатын 9 кылааһын үөрэнээччитэ, Оҕо искусствотын оскуолатын хор кылааһыгар иккис сылын дьарыктанар, хас да конкурс Гран-при хаһаайына Дьулурҕан Харитонов ыраас, күүстээх куолаһынан ыллаан, дьон сэҥээриитин ылыан ылла.
Анна Федулова домраҕа үөрэппит оҕолоро Виктория Корякина, Анна Матвеева, М. Жирков аатынан Дьокуускайдааҕы музыкальнай колледж преподавателэ Мария Иванова “Край березовый” айымньыны оонньоон иһитиннэрдилэр.
Нам улууһун композитора Василий Зырянов “Туйаарыма Куо” музыкальнай драматыттан сүрүн оруоллар ыллаан иһитиннэрдилэр. Ол курдук: Уот Уһутаакы ырыата – Аппааны нэһилиэгин “Чороон” норуот айымньытын киинин фольклор салаатын специалиһа Степан Находкин, Туйаарыма Куо ырыата – Республикатааҕы Олоҥхо ыһыаҕын муҥутуур кыайыылааҕа, Олоҥхо тыйаатырын артыыһа Яна Ньюргусова, Үрүҥ Уолан ырыата – “Тэтим” фольклор бөлөҕүн салайааччыта, Петр Ядрихинскай — Бэдьээлэ аатынан Олоҥхо дьиэтин фольклор салаатын специалиһа Сандр Находкин, Кыыс Кыскыйдаан ырыата – республикатааҕы олоҥхо күрэхтэрин “Кылыһах ырыалаах олоҥхоһут”, “Удьуор утумун тутааччы” анал аат хаһаайката Ньургустана Лебедева.
З.П. Винокуров аатынан Оҕо искусствотын оскуолатын оркестрын 45 сыллаах үбүлүөйүнэн, оҕону кэрэҕэ уһуйбут, үтүмэн таһаарыылаах үлэлэрин иһин преподователлэрин наҕараадалааhын буолла:
-“СӨ эбии үөрэхтээhиҥҥэ кылаатын иһин” бэлиэнэн оркестр салайааччыта А.А. Федулова;
-СӨ Бочуоттаах грамотатынан Е.П. Новгородова, С.М. Захарова;
-“Нам улууһа” МТ култуураҕа кылаатын иһин” бэлиэнэн Е.М.Семенова, П.М. Сидорова;
-“Нам улууһа” МТ Бочуоттаах грамотатынан Р.С. Заровняева, Н.И. Татаринова, Г.А. Пономарева, У.К. Новгородова, М.Е. Дьяконова, Р.П.Сергеева, А.А. Федулова;
-Махтал суругунан Ф.Г. Корякина, А.Г. Павлова, Г.П. Шулиновская, Ж.А. Захарова, А.Е. Бубякин, Е.А. Колосов, Нь.П. Федоров, В.С. Корякина, М.А. Попова.
Наммыт улууhун оҕолору кэрэҕэ угуйар З.П. Винокуров аатынан Оҕо искусствотын оскуолатын учууталларын оркестра тэриллибитэ 45 сылынан эҕэрдэлиибит! Сыралаах үлэҕит кэнэҕэски даҕаны сыаналана, биhирэнэ турдун!
Лена Корякина