Быйыл от эрдэ ситэн, күнү-дьылы баттаһа Бөтүрүөп күнүн, «Абааһы мунньаҕын» иннинэ хаһаайыстыбалар оттоон саҕалаабыттара. Бу күннэр кэннилэриттэн халлаан эрэ туран биэрдэр от үлэтэ маассабайдык саҕаланыа турдаҕа.
Улуустааҕы тыа хаһаайыстыбатын управлениета от ыйын 12 күнүнээҕи иһитиннэриитинэн, 2023 сыл тохсунньу 1 күнүнээҕи туругунан 12430 төбө сүөһү, 16297 төбө сылгы баара биллэр. Онон кыстыкка киириигэ 27000 туонна дороххой аһылыгы бэлэмнииргэ сыал-сорук турар. Оттуур хампаанньаҕа барыта 1655 киһи, 534 звено, 744 трактор кыттыаҕа.
Оперативнай дааннайынан улуус үрдүнэн 399 тракторы туһанан 351 от звенотугар 574 киһи ходуһаҕа оттуу сылдьар. Ол иһигэр 151 — механизированнай, 183 — механизированнай аҥардаах, 17 – илиинэн. Уопсайа 1019 га сир охсуллубутуттан 1139,5 тн оту чөкөппүттэр, ол эбэтэр былаан туолуута 4,1%-ҥа тэҥнэспит. График быһыытынан от ыйын 16 күнүгэр диэри биэс бырыһыаҥҥа (1378 т) тахсыахтаахпыт. Ааспыт сылга, ол эбэтэр 2022 сыл от ыйын 18 күнүнээҕи туругунан, улуус үрдүнэн 922 гектарга от охсуллубутуттан 654 тн от бэлэмнэниллибит. Мантан көрдөххө быйыл балай эмэ эрдэлээн иһэр эбиппит. Ол да буоллар, арыыга оттуур нэһилиэктэр бааржа кэлэрин манаһаллар.
Бу күннээҕи туругунан тэрээһиннээх бааһынай хаһаайыстыбалар уопсайа 409,5 тн, онтон кэтэх хаһаайыстыбалаахтар 715 тн оту ыллылар.
Семен Аргунов