Нам улууһун килиэбинэн хааччыйа олорбут Партизан, Хатырык бэкээринэлэрэ үлэлэрин тохтоппуттара нэһилиэнньэ олоҕор биллэрдик дьайда. Билиҥҥитэ улууһу бүтүннүү Нөмүгү собуота хааччыйар. Бу туһунан хаһыаппыт ааҕааччылара социальнай ситимнэрбитигэр санааларын хото этиннилэр.
Биһиги Партизан нэһилиэгин дьаһалтатыгар эрийэн ыйыталаспыппыт, кэккэ сылларга бэрт ситиһиилээхтик уонна таһаарыылаахтык үлэлии олорбут олохтоох бэкээринэ атырдьах ыйыттан үлэтин тохтоппута билиннэ. Ол эрэн, бэкээринэ олоччу сабыллыбатах. Атыыланар түгэнигэр, саҥа хаһаайын үлэлэтэригэр бүүс-бүтүннүү бэлэм турар эбит. Ол курдук, уота-күөһэ, итиитэ араарыллыбатах. Оттон хаһаайка доруобуйатын туругунан үлэлииртэн аккаастаммыт.
Улууска минньигэс, тотоойу килиэптээҕинэн биллибит Хатырык бэкээринэтэ Нам сэлиэнньэтигэр көһөн кэлэрэ билиннэ. Ону бигэргэтээри биһиги хаһаайыттары кытары кэпсэтэ сырыттыбыт.
Любовь Охлопкова, Хатырык бэкээринэтин хаһаайката:
Биһиги Нам сэлиэнньэтигэр Таллан Бүрэ аатынан уулусса 1/1 аадырыһыгар дьиэ булан, көһөн кэлэн үлэлээри бэлэмнэнэ сылдьабыт. Улахана барыта бүттэ, гаас эрэ холбоноро хаалла. Биир ый кэриҥинэн аһыллыахтаахпыт диэн былааннанабыт. Улааттыбыт, кэҥээтибит, саҥа оборудование ылынныбыт, биир сменаҕа 3000 килиэби оҥорон таһаарар буолуохтаахпыт. Маны тэҥэ, кондитерскай бородууксуйа былаанныыбыт. Улуус дьаһалтата дьиэ булунарбытыгар көмөлөстө. Билиҥҥитэ миэстэтигэр лааппы, маҕаһыын арынар былаан суох, онон аспытын-үөлбүтүн маҕаһыыннарынан тарҕатыахпыт. Инникитин сайдан үлэбит хайдах салалларыттан көрөн, баҕар, миэстэтигэр маҕаһыын туһунан толкуйдуохпут.
Килиэп астыырынан 2016 сылтан дьарыктанабыт. Бастаан Хатырыкка бэйэтигэр атыылаабыппыт. 2017 сылтан Хамаҕаттаҕа диэри нэһилиэктэри килиэбинэн хааччыйар буолбуппут. Билигин улуус киинигэр кэлбиппитинэн, 1 Хомустаахха тиийэ тиэрдэр санаалаахпыт.
Лена НОГОВИЦЫНА