Нэһилиэнньэни олох-дьаһах, коммунальнай өҥөнөн хааччыйар хаһаайыстыба үлэһиттэрин күнүнэн (кулун тутар 15 күнэ) бу эйгэҕэ лоп курдук 20 сыл үлэлии сылдьар Егор Егорович Кудринтан уонна үлэһиттэртэн хайдах-туох үлэлээн кэлбиттэрин билсиэҕиҥ.
- Егор Егорович, Хамаҕаттаҕа сылааһынан хааччыйар салааҕа хаһааҥҥыттан үлэҕин саҕалаабыккыный?
Мин Хамаҕатта производственнай учаастагар 2006 сыл кулун тутар ыйтан слесарынан үлэбин саҕалаабытым. 2012 сыл тохсунньу ыйтан маастарынан анаммытым. Учаастакпыт икки нэһилиэги итиинэн хааччыйара. Ол саҕана Хамаҕаттаҕа — 4, Никольскайга -2 котельнай баара, онно барыта 24 оператор, 3 слесарь. 1 сварщик,1 электрик үлэлиир этэ. 2012 сыллаахха учаастакпытыгар икки котельнай эбиллибитэ, саха-француз лицей интерната уонна начальнай оскуолата.
- Бу билигин үлэлии турар улахан котельнай хаһааҥҥыттан үлэлиирий?
2012с. күһүн саҥа квартальнай котельнай тутуллан үлэҕэ киирбитэ. Усулуобуйа олох тупсубута. Ити сыл сайын «Кытылчаан» детсад котельнайа саҥаттан оҥоһуллан үлэҕэ киирбитэ. Теплотрассатын эмиэ уларытан, саҥардан биэрбиппит.
- Үлэҕитигэр өссө туох уларыйыылар киирбиттэрэй?
2013с.Никольскай оскуолатын уонна кулууп котельнайдара реконструкция оноһуллубута. Эргэ КЧМ котеллар оннуларыгар саҥаттан муостатын бетоннаан, аныгы «Новелла» диэн котеллары туруорбуппут.2014с. саха-француз лицей интернатыгар уонна начальнай оскуолатыгар саҥа котельнайдар тутуллубуттара, теплотрассалара уларытыллан оноһуллубута. 2014 сылга врачебнай амбулатория котелларын уларытан саҥа котеллары туруорбуппут. Бу сылтан 4 котельнай: амбулатория, саха-француз интернатын, начальнай оскуолатын уонна «Кытылчаан» детсад котельнайдара барыта автоматизированнай буолбуттара, уопсай диспетчеризацияҕа холбонон АДС диспетчерэ көрөр буолбута.
2015 сыл кыһыныгар Никольскайга саҥа тутуллубут АКЦ–га (административно-культурный центр) котельнай тутан үлэҕэ киллэрбиппит.
2016-17сс. Хамаҕатта спортзалын котельнайын биһи көрөн үлэлээбиппит.
- Нэһилиэккэ улахан таас тутуулар, саҥа объектар киирбиттэригэр кыстыгы этэҥҥэ туоруурга туох дьаһаллары ылбыккытый?
2020 сылга квартальнай котельнайга үс котел уларыйда, урут 3 МВт буоллаҕына, билигин 5 МВт кыамталаах буолла. Ити барыта Хамаҕаттаҕа саҥа оскуола уонна детсад үлэҕэ киирэллэринэн сибээстээн оҥоһулунна. Ону таһынан уу емкостара турар площадкатыгар саҥаттан бетон кутулунна.
2021с. квартальнай котельнайга насоснай группа уларыйда. Саҥа оскуолаҕа уонна саҥа детсадка диэри саҥа тепломагистраль тардылынна.
2024 сылтан уларыйыы баран, Хамаҕатта учаастагын Нам селотугар холбоон
биир производственнай участок оҥорбуттара. Ол түмүгэр, мин Намҥа «Служба эксплуатации» диэн отдел маастарынан үлэлии сылдьабын.
Бу араас кэмнэргэ учаастакпытыгар 16 үлэһит баара. Ол иһигэр слесарьдар Новгородов Г.В., Охлопков В.К., Скрябин Р.П., сварщик Семенов А.С., электрик Мокрощупов В.И., оператордар Бурнашева Д.Н., Парников Г.Р., Петров А.А., Иванова Л.В., Эверстова Е.В., Аммосова А.И., Протопопов Н.Н., Неустроев Н.К., Герасимов И.И., Олесов В.И., Громова В.Е.
Коллективпыт үлэһиттэрэ нэһилиэкпит общественнай олоҕуттан туора турбаттар. Араас субуотунньуктарга, нэһилиэк чиэһин көмүскүүр фестивальнай конкурстарга, спортивнай күрэхтэргэ көхтөөхтүк кытталлар.
Бэйэбит тэрилтэбит профсоюһун иһинэн ыытыллар тэрээһиннэргэ ситиһиилээхтик кыттабыт. Үлэһиттэр сылын аайы санаторнай-курортнай эмтэниигэ сылдьан доруобуйаларын чэбдигирдэллэр. Тыйыс тымныылаах дойдубутугар дьон сылаас дьиэлэргэ үлэлииллэригэр, олороллоругар бары кыһамньыбытын уурабыт.
Слесарь Валерий Охлопков: Билигин Хамаҕаттаҕа икки котельнайга 6 оператор үлэлиир: Тарбахов М.Н., Бурнашев И.И., Федоров И.И., Аргунова А.И., Петров А.А., Протопопов Н.Н., уонна 3 слесарь — Скрябин Р.П., Новгородов Г.В., Охлопков В.К., сварщик Семенов А.С. Нэһилиэк улахан социальнай объектарын, элбэх квартиралаах дьон олорор дьиэлэрин – барыта уонтан тахса объегы, ону таһынан Никольскай оскуолатын, уһуйаанын техническэй обслуживаниетын оҥоробут.
Сварщик Аркадий Семенов: Биһиги үлэбит күннэри-түүннэри бэлэм буолары эрэйэр. Телефоммутун хоонньоһон утуйабыт. Сигнал кэллэр эрэ, ханна баҕар тиийэбит. Манна үксүгэр Гаврил Новгородов массыыналаах буолан, онон сылдьааччыбыт. Ол гынан баран саахал тахсыбатын курдук үлэлиибит.
Хамаҕатта нэһилиэгин дьиэ-уот коммунальнай хаһаайыстыбатын эйгэтигэр үлэлиир уонна үлэлии сылдьыбыт бары үтүө үлэһит дьонун бүгүҥҥү идэлээх күннэринэн истинник эҕэрдэлиибит уонна түүннэри-күнүстэри сыралаах үлэлэрэ өрүү үтүө түмүктээх буоларыгар баҕарабыт!
Мария Винокурова