Нам улуустааҕы үөрэх управлениетын уопсай үөрэх хаачыстыбатын хааччыйыы уонна мониторинг отделын кылаабынай специалиһа Нюргустана Колодезникова биир кэлим экзаменнары туттарыы балаһыанньатын быһаарар:
«СӨ сиригэр-уотугар регистрацияланыы уонна сайабылыанньаны ылыы олунньу 1 күнүгэр диэри салҕанан барыаҕа. Онон БКЭ туттарыан баҕалаахтар 2025 сыл олунньу 1 күнүгэр диэри ханнык предметтэри талалларыгар быһаарыныахтарын уонна регистрацияны ааһан, сайабылыанньаны биэриэхтэрин наада.
Государственнай түмүк аттестация 14 дисциплинанан көрүллэр, ол иһигэр нуучча тыла уонна математика булгуччулаах, өссө хас да предмети үөрэнээччи бэйэтэ талар, предмет ахсаанынан хааччахтаммат.
Үрдүкү кылаас үөрэнээччилэрэ ханнык предметтэри талалларын быһаарына илик буоллахтарына, 2025 сыл олунньу 1 күнүттэн хойутаабакка туран быһаарыныы ылыныахтаахтар. Быйылгы выпускниктар, 11-с кылаас үөрэнээччилэрэ, БКЭ-ҕэ кыттар сайабылыанньаларын үөрэнэр оскуолаларыгар биэрэллэр.
Урукку сыллар выпускниктара, түптээн олорор миэстэлэрэ суох дьон, беженец статустаахтар, бас билии бары көрүҥнээх алын уонна орто профессиональнай үөрэх (салгыы — СПО) кыһаларын программаларынан үөрэнээччилэр, ону тэҥэ уопсай орто үөрэхтээһини омук сирдэрин оскуолаларыгар ылааччылар олунньу 1 күнүгэр диэри, бу күнү киллэрэн туран, БКЭ-ҕэ кыттар болдьохторун уонна талбыт предметтэрин ыйан туран, сайабылыанньаны Нам улуустааҕы үөрэх управлениетыгар, уопсай үөрэх хаачыстыбатын хааччыйыы уонна мониторинг отделыгар маннык аадырыска: Нам с., Файзулин уул., 3, 2 этээс, 29 №-дээх каб. тиксэрэҕит, билсэр нүөмэр: 8-(41162)-42-5-63.
Бэйэҕитин кытта инники ылбыт үөрэххит таһымын туоһулуур докумуоҥҥутун, эбэтэр үөрэххит туһунан докумуоҥҥут олохтоммут бэрээдэгинэн бигэргэтиллибит куоппуйатын, ону таһынан докумуоҥҥут дьиҥнээҕин уонна СНИЛС, паспоргыт куоппуйаларын илдьэ кэлэҕит. СПО-ҕа үөрэнээччилэр сайабылыанньа биэриигэ үөрэхтэрин кыһаларыттан орто уопсай үөрэхтээһин программатынан билии ылалларын туһунан эбэтэр бу үөрэх сылыгар орто профессиональнай үөрэх программатын бүтэрбитин туоһулуур справкаларын көрдөрөллөр, туттараллар.
Экстерннэр үөрэх тэрилтэлэрин талан экстерҥҥэ сайабылыанньаларын биэрэллэр.
Доруобуйаларынан хаарчахтаахтар БКЭ-ҕэ сайабылыанньа биэрэллэригэр психолого-медико-педагогическай хамыыһыйа мэктиэлээһинин куоппуйатын, оттон инбэлиит уонна инбэлиит-оҕолор – медицинскэй-социальнай экспертиза федеральнай государственнай тэрилтэтэ биэрбит инбэлиит буолуу чахчытын бигэргэтэр справкатын дьиҥнээҕин, эбэтэр куоппуйатын, ону тэҥэ РФ үөрэҕин министиэристибэтин уонна наука эйгэтигэр надзорга Федеральнай сулууспатын 2023 с. муус устар 04 күнүнээҕи 233/552 №-дээх орто уопсай үөрэхтээһин программаларынан государственнай түмүк аттестацияны ыытыы Бэрээдэгин 59, 60 пууннарынан көрүллүбүт ПМПК мэктиэлээһинин куоппуйатын көрдөрөллөр, туттараллар.
БКЭ-ни ааһыыга сайабылыанньаны регистрациялыыр тэрилтэ миэстэтигэр сайабылыанньа ылыыны тэрийэр. Сайабылыанньа бэриллибит күнүгэр БКЭ кыттыылаахтарын сайабылыанньа биэрэллэрин бэлиэтиир сурунаалга булгуччулаахтык регистрацияланар. Сурунаалга маннык сибэдиэнньэлэр ыйыллаллар: регистрацияламмыт нүөмэрэ, бэлиэтэммит күнэ, БКЭ кыттыылааҕын А.А.А.а., личноһын туоһулуур докумуон сибэдиэнньэлэрэ — докумуон серията, нүөмэрэ, ханнык тэрилтэ хаһан биэрбитэ, регистрацияламмыт миэстэтэ, БКЭ-ни туттарар предметтэрин испииһэктэрэ. Сайабылыанньаны ылбыт киһи илии баттааһына оҥоһуллар.
Бу сыллааҕы выпускниктар эмиэ базовай эбэтэр профильнай таһымнаах математиканы туттараларын быһаарыныахтарын наада. Математика базовай таһыма аттестат ыларга эрэ наадалаах буоллаҕына, оттон математика профильнай таһыма үрдүк үөрэххэ туттарсар баҕалаах выпускниктарга наадалаах уонна математика билиини тургутуу предметтэрин испииһэгэр киирбит буоллаҕына барсар.
Урукку сыллардааҕы выпускниктар, СПО-ҕа үөрэнэр буоллахтарына, ону таһынан орто уопсай үөрэхтээһини омук дойдуларын үөрэҕин тэрилтэлэригэр ылааччылар БКЭ-ҕэ маннык үөрэх предметтэригэр кытталлар: нуучча тыла, профильнай таһымнаах математика, литература, физика, химия, биология, география, история, обществознание, омук тыллара (английскай, немецкэй, французскай, испанскай, кытай тыла), информатика уонна информационнай-коммуникационнай технологиялар (ИКТ) – баквалариат, специалитет программаларынан үөрэнэ киириигэ БКЭ түмүктэринэн үөрэххэ туттарсыыга бэйэлэрэ талаллар. Бу категорияҕа БКЭ-ҕэ кыттааччыларга базовай таһымнаах математика көрүллүбэт».
Биир кэлим экзамены (БКЭ) туттарааччылар бары боппуруостаргытын Нам с., Файзулин уул., 3, Нам улуустааҕы үөрэх управлениетыгар, уопсай үөрэх хаачыстыбатын хааччыйыы уонна мониторинг отделыгар, 2 этээс, 29 №-дээх каб., Нам улууһун эппиэттээх координаторыгар Нюргустана Прокопьевна Колодезниковаҕа, 8 (411-62) 42-5-63 нүөмэргэ билсиэххитин сөп. 2025 сылга БКЭ-ҕэ кыттарга сайабылыанньаны биэрэр болдьоҕу куоттарымаҥ!
Касьян Олесов-Олук