Олохпут укулаата төрдүттэн уларыйан, билиҥҥи буола турар балаһыанньаҕа саҥа сокуоннар, сүөргү уураахтар ылыллан, тыа дьонугар охсуулаах өрүттэрэ элбээтэ.
Аҕыйах балыкка уонунан мөлүйүөн ыстарааптаныы, сылгыны-сүөһүнү массыына үнтү көттөҕүнэ, таҥнары сылгылаах киһи эппиэтинэһи сүгүүтэ, хайдах эрэ барыта сүөргү. Сүөһү-ас ииттэр тыа дьонун кыһарыйыы буолан тахсара өйдөммөт өрүтэ үгүс.
Дьоллоох Дьокуускайтан Намҥа кэлэр чоху көхсүн курдук тэргэн айан суолунан, аныгы кыахтаах омук массыыналара хотоҕостуу субуллаллар, сындыыстыы сыыйыллаллар.
Куораттан 49 км, Үөдэй нэһилиэгэ диэн вывескаҕа, быһымах-күлүмэх айанньыт бириэмэтигэр көрбөккө, суолга тахсан кэлбит айыы дьөһөгөй сылгыларын түҥнэри көтүү кэккэ сылларга үгүстүк тахсар буолла.
Бу аҕыйах хонугу быысаһан икки сылгыны түҥнэри көттүлэр. Сылгы өлүүтэ, массыына алдьаныыта буолбакка, олорсон иһэр дьон-сэргэ эчэйэн хаалыахтарын сөп ээ…
Бу түгэҥҥэ, санаан көрдөххө, буруйдаах суоппар буолуон сөп курдук да, аныгы сокуонунан сылгылаах хаһаайын сэмэҕэ тардыллар эбит.
Суоппар нэһилиэнньэлээх сиргэ арыый да бытааран, сэрэхтээхтик сылдьара буоллар, айыы дьөһөгөй оҕото эчэйиэ, массыына алдьаныа суоҕа этэ буоллаҕа.
Саха сиригэр сылгыны кыһыны-сайыны быһа хаайан, харабыллаан, манаан аһаппатыҥ чахчы. Соҕуруу дойдулар сокуоннарын үтүктэр сахаларга барсыбат ээ.
Кэлиҥҥи кэмнэргэ субуруччу кураан сайыннар буолан алаастар, дүөдэлэр уулара уолан сайылык сылгылара, сүөһүлэрэ трасса кытыытыгар хаалбыт ууларга уулуу кэлэн быстахха былдьаналлар.
Сайын аайы ити биир сиргэ түҥнэри көтөллөр.Массыыналаах да, сылгылаах да дьоҥҥо ороскуот, олорсон иһэр пассажирдарга да куталлаах.
Сылга буолар улуус баһылыгын отчуотугар нэһилиэнньэлээх пууҥҥа айан тэтимин хаарчахтыыр бэлиэни уонна хаартыскаҕа түһэрэр, видеоҕа устар туһунан туруорсубуппут. Билиҥҥитэ хамсааһын суох. Дьиҥэ, кэм суоппардар тардыныа, сылгылаах дьон көмүскэллээх курдук буолуо этилэр.
Бу этиилэрбитин улуус туһааннаах салалталара болҕомтоҕо ылан олоххо киллэрэллэрэ буоллар, техникалаах дьоҥҥо, олохтоохторго, пассажирдарга да үчүгэй өрүтэ үгүс буолуо этэ.
П.Е. Федотов, Үөдэй
Хаартыска: ааптар тиксэриитэ
—