Тохсунньу 28 күнүгэр 2025 сыл түмүгүнэн бастыҥнары чиэстиир долгутуулаах, кэтэһиилээх тэрээһин буолан ааста.
Түмүктэри таһааран, саҥа соруктары туруорунан улууспут сайдыытын түстүүр күммүтүгэр биир дойдулаахпыт, СӨ Ил Түмэн бэрэссэдээтэлэ Алексей Ильич Еремеев ыалдьыттаата. Кини кэлэр сылга биир санаанан салайтаран, хас биирдиибит бэриниилээхтик үлэлээн, үтүө суобастаахтык сыһыаннаһан, түмсүүлээхтик иннибит диэки хардыылыаҕыҥ диэн ыҥырда.
Улууспутугар 2025 сылы Кыайыы сылынан биллэрэн кэккэ былааннаах, инники сайдыыбытын түстүүр үтүө түмүктээх үлэлэр ыытылыннылар. Ону тэҥэ, Улуу Кыайыы 80, Нам оройуона төрүттэммитэ 95 сылларын бэлиэтиир уһулуччу үбүлүөйдээх сылы бэрт тэрээһиннээхтик, үлэҕэ-хамнаска, спортка, культураҕа кэккэ ситиһиилэрдээх түмүктээтибит.
Улуус баһылыга Юрий Иннокентьевич Слепцов, улуус баһылыгын солбуйааччылар Юрий Вячеславович Дьяконов, Егор Андреевич Протопопов, тыа хаһаайыстыбатын боппуруостарыгар солбуйааччы Филипп Васильевич Николаев, Нам улууһун депутаттарын Сэбиэтин Бэрэссэдээтэлэ Алексей Иванович Винокуров тыа сирин түөлбэлэригэр анал ааттары туттардылар.
«2025 сыл түмүгүнэн бастыҥ тыа сирин түөлбэтэ» кыайыылаахтарынан Ленскэй, Модут, Арбын нэһилиэктэрэ, Нам улууһун тыа сирин түөлбэлэрин икки ардыгар тыа хаһаайыстыбатыгар бородууксуйа тутаах көрүҥнэрин толоруутун кыайыылаахтарынан Хатыҥ Арыы, Үөдэй, Модут нэһилиэктэрэ ааттаннылар.
2026 сыл улууспутугар Илья Егорович Винокуров 130 сыллаах үбүлүөйүн сылынан, дьиэ кэргэн экономикатын сайыннарыы уонна Нам улууһугар үөрэҕирии 155 сылынан биллэрилиннэ.
Дарина Константинова
Видео Роман Шапошников