Саха сирин үрдүнэн ыам ыйын 6 күнүттэн “Безопасные окна” акция биллэрилиннэ. Акция чэрчитинэн Нам сэлиэнньэтигэр оҕо оһоллонуутун уонна аһаҕас түннүктэн оҕо сууллуутун сэрэтэр сыаллаах акция ыам ыйын 20-31 күннэригэр диэри ыытыллар.
Бэлиэтээтэххэ, сылын аайы Дойдуга аһаҕас түннүктэн оҕо сууллар араас түбэлтэлэрэ тахсаллар. Хомойуох иһин, быһылааннар доруобуйаҕа улахан эчэйиини аҕалаллар эбэтэр өлүүгэ тиэрдэллэр. Акция чэрчитинэн, оскуолаларга, уһуйааннарга, төрөппүттэргэ, оҕолорго өйдөтүү үлэтин ыытыахтара. Саастарын ситэ илик оҕолорго уонна кинилэр бырааптарын көмүскүүр уопсастыбаннай сэбиэт чилиэннэрэ элбэх квартиралаах дьиэлэргэ иһитиннэрэр, өйдөтөр памяткалары иилиэхтэрэ, нэһилиэнньэҕэ өйдөтүү үлэтин ыытыахтара.
Убаастабыллаах төрөппүттэр! Аһаҕас түннүк – оҕоҕо кутталы үөскэтэр!
Оҕо эчэйиитэ, аһаҕас түннүктэн сууллара тахсыбатын туһугар быраабылалары тутуһун:
— Дьиэҕэ кыра оҕо баар буоллаҕына, түннүккүн аһаҕас хаалларыма;
— Түннүк анныгар, таһыгар ыттыахха сөптөөх малы туруорумаҥ;
— Түннүккүт көмүскэллээх буолбатах буоллаҕына, антимоскитнай сетканы түннүккэ иилимэҥ;
— Кыра оҕолорго түннүк хайдах арылларын көрдөрүмэҥ;
— Түннүктэргэ оҕо замоктарын туруорун эбэтэр түннүк арыйар тутааҕын тууран оҕо тиийбэт сиригэр ууруҥ;
— Улахан киһитэ суох балкоҥҥа кыра оҕо тахсарын көҥүллээмэҥ;
— Сэрэхтээх буолууга оҕону үөрэтиҥ.
Хас биирдии төрөппүт, улахан киһи сөпкө өйдүөхтээх. Оҕо доруобуйата уонна олоҕо төрөппүт эппиэтинэһигэр.
Ленскэй нэһилиэк олохтоох дьаһалтата