«Айар кыһа Саха сирин улуустарын кытта ыкса ситимнээхтик, күүстээхтик үлэлэһэр. Билигин кыһа 5 улууска маҕаһыыннаах уонна үгүс улууска эрэллээх партнердардаах.
Олунньу 11 күнүгэр ыытыллыбыт «„Айардыын“ бииргэ. Сыл бастыҥнара» диэн ааспыт 2025 сыл түмүктэрин бэлиэтиир үөрүүлээх дьоро киэһэҕэ төрөөбүт тылы харыстааһыҥҥа, ааҕыыны сайыннарыыга тиһиктээхтик, таһаарыылаахтык үлэлэһэр дьоннор уонна партнердар бэлиэтэннилэр.
Маны тэҥэ, ааҕыыны көҕүлүүр, литератураны пропагандалыыр сыалтан өрөспүүбүлүкэ үрдүнэн сыл түмүктэринэн саамай ааҕар улууһу быһаарар үгэс баар! Бу быһаарыыга улуус бибилэтиэкэлэрэ кыһаттан төһө кинигэни ылаллара, нэһилиэнньэ маҕаһыыннартан уонна биирдиилээн тарҕатааччылартан кинигэни төһө атыылаһара, улуустар бэйэлэрэ төһө кинигэни сакаастаан бэчээттииллэрэ, оскуолалары үөрэх кинигэлэринэн хааччыйыылара барыта учуоттанар.
Дьоро киэһэҕэ үөрүүлээх быһыыга-майгыга «Саамай ааҕар улуус» үрдүк аат Мэҥэ-Хаҥаласка туттарылынна! Улуус баһылыга Дмитрий Иванович Тихоновка уонна култуураҕа уонна духуобунай сайдыыга салалтатын салайааччытыгар Анна Руслановна Исаковаҕа истиҥ махталбытын тиэрдэбит.
Мэҥэ Хаҥалас улууһа бу үрдүк аакка 2023 уонна 2025 сылларга ылбыта оруннаах! Тоҕо диэтэххэ, бу улууска ааҕыыны көҕүлүүр тэрээһин утумнаахтык, таһаарыылаахтык ыытыллар. Ааспыт сылга биирдиилээн кинигэни тарҕатааччылар ордук күүскэ үлэлээннэр үрдүк көрдөрүүгэ таҕыстылар. Ону тэҥэ, улуустааҕы үөрэх салаата оскуолаларын элбэх үөрэх кинигэлэринэн хааччыйда, улуус бэйэтин кинигэтин таһаарыытыгар былааннаах үлэни ыытар.
Барҕа махтал буоллун бииргэ үлэлэһэр партнер дьоммутугар – ааҕыыны таптыылларын уонна тарҕаталларын иһин! Бииргэ буоллахпытына эрэ сахабыт тыла, култуурата, литературата барҕара сайдыаҕа!