Бүгүн, балаҕан ыйын 18 күнүгэр, сарсыарда Россия Федерациятын Государственнай Думатын IX ыҥырыылаах депутаттарын талыы, Саха Өрөспүүбүлүкэтин народнай депутатын эбии талыы быыбара саҕаланна.
Нам улууһугар 27 быыбардыыр учаастак баар, ол иһигэр Намҥа 7, нэһилиэктэргэ 20. Бүгүн сарсыарда 8 чааска Аппаанытааҕы 342 №-дээх быыбардыыр учаастак Россия уонна Саха Сирин өрөгөйүн ырыатынан быыбардааччыларын көрүстэ.
Сарсыарда быыбардыыр учаастак үлэтин саҕалыан инниттэн дьон тоҕуоруһа мустубут. Ким үлэтигэр баран иһэр, ким гражданскай иэһин толорон быыбардаан аастылар. Быыбардааччылар олус көхтөөхтөр, ол курдук «Далбар» дьахтар сэбиэтин чилиэннэрэ (предс. Дария Мальцева) саха таҥаһын кэтэн, дьиэ кэргэнинэн кэлэн куоластаатылар. «Нам улууһа» МО баһылыгын бастакы солбуйааччыта Анатолий Павлов уолун илдьэ сылдьан быыбар хайдаҕын билиһиннэрдэ.
Миролюбовь Сивцева, 342 №-дээх быыбардыыр учаастак председателэ:
— УИК-ка 7 чилиэн үлэлиир, кэтээн көрөөччүлэр бааллар. Балаҕан ыйын 18 күнүгэр, быыбардыыр учаастак испииһэгэр киллэриллибит быыбардааччылар ахсааннара — 1291. Бу быыбардыыр учаастакка баар сиринэн быыбардааччылар испииһэктэригэр киллэрэр туһунан сайабылыанньа биэрбиттэр ахсааннара — 21. быыбардааччылар испииһэктэриттэн уһуллубут, атын быыбар учаастагар быыбардааччылар испииһэктэригэр киллэрэр туһунан сайабылыанньа биэрбиттэр — 99. 18 саастарын туолбут бастакытын куоластааччылар 33-тэр. Онтон саамай аҕа саастаах куоластааччыбыт 1943 с.т. үлэ, тыыл бэтэрээнэ, СӨ «Гражданская доблесть» бэлиэ хаһаайката, Нам улууһа, Хатыҥ Арыы нэһилиэк «Ытык киһитэ», Учууталлар учууталлара, СӨ үөрэҕириитин туйгуна Мария Егоровна Эверстова буолар.
Семен Аргунов