Е.С. Сивцев-Таллан Бүрэ аатынан Бөтүҥ орто оскуолатын 120 сыллаах үбүлүөйдээх тэрээһинин чэрчитинэн, ураты бэлиэ түгэнинэн, СӨ үпкэ министиэристибэтэ ыыппыт күрэҕэр үөрэнээччилэр оскуола аактабай саалатын саҥардар “РИТМ” бырайыактара кыайыылаах тахсан, грант ылбыттарын түмүгэр, бүгүн тупсубут, киэркэйбит саала үөрүүлээхтик аһылынна.
Аалай лиэнтэни быһа кырыйдылар: Егор Протопопов, Нам улууһун баыһылыгын солбуйааччы, Александр Дмитриев, оскуола дириэктэрэ, Валериан Емельянов, СӨ культуратын туйгуна, СӨ культуратын үтүөлээх үлэһитэ, “Гражданскай килбиэн” бэриэ хаһаайына, Нам улууһун, Бөтүҥ нэһилиэгин бочуоттаах киһитэ уонна бырайыагы көҕүлээччи, 8 кылаас үөрэнээччитэ Арылхан Данилов.
Саҥардыллыбыт саалаҕа оскуолаҕа бастакынан струннай оркестры тэрийбит, муусука куруһуогун үлэлэппит Георгий Иннокентьевич Емельянов, Дарья Петровна Колпашникова ааттарын иҥэрии мустубуттарга үөрүүнү өссө үрдэттэ. Оскуола дириэктэрэ Александр Дмитриев бырайыак үлэтин, ситиһиини сырдатта.
Инженернэй-техническэй саҥа хайысханы тутуһар оскуола үрдүк аатыгар үгүс үтүө тыл этилиннэ, үлэ түмүктэрэ ахтылынна, истиҥ-иһирэх ахтыы оҥоһулунна, иэйиилээх ырыа дьиэрэйдэ. Дириэктэр Александр Гаврильевичка эҕэрдэ суруктар, сэмэй бэлэхтэр туттарылыннылар
Үбүлүөйдээх тэрээһин бочуоттаах ыалдьыттарынан үтүө өйдөбүлү хаалларбыт улахан Учууталлар Г.И. Емельянов, Д.П. Колпашникова оҕолоро: уоллара Валериан Георгиевич кэргэнинээн медицинскэй наука кандидата, доцент Эльвира Андреевнаны, кыыстара педагогическай үлэ бэтэрээнэ Светлана Емельянова, кыра уоллара, үрдүк үөрэхтээх инженер Петр Емельянов, сиэннэрэ — Д.К. Сивцев-Суорун Омоллоон аатынан СӨ Государственнай опера уонна балет театрын артыыһа, СӨ народнай, СӨ үтүөлээх артыыһа, Италияҕа ыытыллыбыт опера ырыаһыттарын Аан дойдутааҕы куонкурустарын лауреата Александр Емельянов кэргэнинээн Дьокуускай куорат Айыы кыһатын дириэктэри иитэр үлэҕэ солбуйааччы Наталья Николаевналыын, «Эрэл» УК дириэктэрэ Прокопий Емельянов кэргэнинээн финансист Полина Петровналыын, сиэн балтылара М.Н. Жирков аатынан Дьокуускайдааҕы музыкальнай колледж студентката София Лепчикова буоллулар.
Ону сэргэ оскуола аатын сүгэр учуутал, поэт, буойун Е.С. Сивцев-Таллан Бүрэ кыра уола, СӨ үөрэҕириитин туйгуна, Россия суруналыыстарын уонна РФ суруйааччыларын сойуустарын чилиэнэ, педагогическай үлэ бэтэрээнэ Степан Сивцев-Хамалҕа кэргэнинээн СӨ нэһилиэнньэтин социальнай харалтаҕа үтүөлээх үлэһитэ Антонина Петровналыын, Таллан Бүрэ сиэнэ, авиация туйгуна Таллан Сивцев эмиэ бочуоттаах ыалдьыт быһыытынын сырыттылар.
Сценаҕа тахсыбыт 8 кылаас үөрэнээччилэрэ бырайыактарын туһунан билиһиннэрдилэр.
Арчын: “Бүгүн саалаҕа мустубут ыалдьыттарбытыгар итии-истиҥ эҕэрдэбитин тиэрдэбит!”
Рустам: “Кырдьыгынан эттэххэ, биһиэхэ, бу сценаҕа тахсан үлэбитин билиһиннэрэрбит олус долгутуулаах уонна улахан чиэс буолар”.
Максим: “Биһиги салайааччыбытын кытта “ШкИБ” (Школьное иницативное бюджетирование) куонкуруска кыттарга сайаапка суруйбуппут. Бэйэбит схема уруһуйдаабыппыт, хас кириэһилэ наада буоларын аахпыппыт. Биһиги олус долгуйбуппут, ол эрээри табылларыгар эрэммиппит”.
Кристина: “Кыайаммыт грант ылбыппытын билэммит үөрүүбүт муҥура суох этэ!”.
Күннэй: “Бүгүн көннөрү саҥардыллыбыт сааланы буолбакка, эһигини кытта биһиги сайдар дьиэбитин арыйабыт”.
Арылхан: “Бу тупсубут саала — биһиэхэ наставниктарбыт, учууталларбыт уонна, биллэн турар, СӨ үпкэ министерствота өйөөбүттэрин түмүгэ. Биһиэхэ итэҕэйбиккит иһин эһиэхэ улахан махталбытын этэбит!”
Көрөөччүлэр, ыалдьыттар оскуола, үөрэнээччилэр ситиһиилэрин биһирээтилэр. Мантан ыла Бөтүҥ орто оскуолатын саҥардыллыбыт сырдык саалата учууталларга, үөрэнээччилэргэ айар үлэни көҕүлүө, кэрэҕэ, үрдүккэ кынаттыа, көрөөччүлэргэ чаҕылхай иэйиилэри бэлэхтиэ.
Касьян Олесов-Олук