Ахсынньы 16 күнүгэр И.Е. Винокуров аатынан Хатыҥ-Арыытааҕы Историяны уонна кыраайы үөрэтэр түмэлгэ инвалидтар декадаларын чэрчитинэн ретро быыстапка турда.
Ахсынньы 15 күнүттэн ахсынньы 26 күнүгэр диэри Нам улууһугар инвалидтар декадалара ыытыллар. Декада улуус инвалидтарын обществота тэриллибитэ 35 сылыгар ананан ыытыллар. Былаан быһыытынан бүгүн түмэлгэ общество чилиэттэрин ретро быыстапка турда.
Үөрүүлээх тэрээһиҥҥэ быыстапка арыллыытыгар улуус инвалидтар обществоларын чилиэттэрэ Хатыҥ-Арыы нэһилиэк инбэлииттэр обществоларын бэрэссэдээтэлэ Мария Степановна Чирикова ыалдьыттары саламааттаах алаадьынан көрүстэ. Түмэлгэ турбут быыстапка үөрулээх чааһын түмэл быыстапка салаатын сэбиэдиссэйэ Людмила Васильевна Петрова салайан ыытта. Хатыҥ Арыы нэһилиэк тыа сирин сэлиэнньэтин депутаттарын сэбиэтин председателэ Евгений Геннадьевич Жирков эҕэрдэлээтэ уонна 25 сыл устата Хатыҥ Арыы нэһилиэгин инвалидтар обществоларын салайан кэлбит Мария Степановна Чириковаҕа бочуотунай грамота, сэмэй бэлэх туттарда. Нам улууһун инвалидтарын обществотын председателэ Марина Дмитриевна Литвинова Мария Степановнаҕа өр сыллаах үлэтин иһин эҕэрдэлээн общество аатыттан махтал суругун уонна бэлэҕин туттарда. Түмэл аатыттан Людмила Петрова эҕэрдэ суругун, бэлэҕин уунна. Ретро быыстапка аалай лиэнтэтин Мария Чирикова, Евгений Жирков, Марина Литвинова быстылар.
Быыстапкаҕа урукку кэминээҕи мал-сал, таҥас-сап, туттар тэриллэр, сэбиэскэй кэми санатан, общество чилиэттэрэ кичийэн уура, көрө харайа сылдьыбыт маллара көрөөччү дьүүлүгэр турда.
Быыстапка түмүгүнэн, 1 м. — Мотрена Руслановна Чирикова (Аппааны ), 2 м. — Варвара Аркадьевна Охлопкова, 3 м. — Анна Иннокентьевна Гоголева (Хамаҕатта) буолан бэлэх туттулар, грамотанан наҕараадаланнылар. Быыстапка бары кыттыылаахтарыгар сертификаттары туттардылар.
Надежда Сивцева