Ыыһаммыт эт, ойоҕос, халбаһы оҥорор Намнааҕы техникум производственнай отделын маастара Дмитрий Аргунов байыаннай дьайыыга сылдьар байыастарга эт ыыһыы сылдьар.
Санатан эттэххэ, саас уонна күһүн улууспутугар делегация тэриллэн байыаннай дьайыыга сылдьар буойуттары баран көрсөллөр, ас-үөл, таҥас-сап, аналлаах тэриллэри, тус аадырыстаммыт баһыылкалары илдьэллэр. Муус устар 8 күнүгэр Нам улууһун депутаттарын сэбиэтин председателэ, байыаннай дьайыы улуустааҕы штабын салайааччыта Алексей Винокуров салайааччылаах 3 киһи биир дойдулаахтарбытын көрсө бараары сылдьаллар.
Бу кыһын Ийэ дойдуларын көмүскүү сылдьар буойуттарга анаан эт хомуурун акцията буолбута. Хас биирдии нэһиллиэкпит дьоно-сэргэтэ акцияҕа көхтөөхтүк кыттыбыттара.
Дмитрий Аргунов техникумҥа вторниктан саҕалаан икки оһоххо 300-кэ киилэ эти ыыһыыр. Киниэхэ үөрэх чааһын уонна үлэ практикатын быһыытынан «Технология продуктов питания животного происхождения 24-1» идэҕэ үөрэнэр студеннар күүс-көмө буолаллар. Ыыһаммыт эти оһохтон таһааран баран, сойбутун кэнниттэн ас пленкатынан суулааннар тоҥороллор. Бу курдук бэһис төгүлүн Дмитрий бэйэтин кылаатын киллэрсэр.
Байыаннай дьайыыга сылдьар Нам улууһун байыастара сотору кэминэн дойдуларын аһын, ыыһаммыт сибиэһэй этин тутан сэниэлэригэр күүс-уох эбиниэхтэрэ.
Семен Аргунов