Бүгүн Бартыһаан орто оскуолатыгар П.П. Юмшанов аатынан тустуу саалата аһыллынна.
Биир дойдулаахпыт, Россия спордун үтүөлээх маастара, Саха спордун маастарыстыбатын Үрдүкү оскуолатыгар көҥүл тустууга Государственнай тренерэ, РФ спордун министерствотын Россия сүүмэрдэммит хамаандаларын бэлэмниир спорт киинигэр ыччат сүүмэрдэммит хамаандатын сүрүн тренерэ Петр Юмшанов бырайыага быйыл биһиги нэһилиэккэ кэлбитэ махталлаах. Оҕолорбут сайдалларыгар улахан төһүү күүс буолуоҕа.
Улуус баһылыгын соц. боппуруоска солбуйааччы Юрий Дьяконов, биир дойдулаахтарбыт, өрөспүүбүлүкэҕэ спорт салалтатыгар үлэлии-хамсыы, ыччаты уһуйа сылдьар уолаттарбыт Вадим Семёнов, Вячеслав Данилов, улуустааҕы спорт управлениетын начальнига Павел Иванов, Намнааҕы спорт оскуола директора Борис Егоров кэлэн үөрүүбүтүн үллэһиннилэр. Кинилэр истэригэр биир дойдулаахпыт «Айрон» спорт тэрилтэтин генеральный директора Макар Зырянов баар. Макар 3 трюко уонна 20000 сертификат туттарда.
Аҕа баһылык Алексей Зырянов махтанан туран, маннык бырайыактар салҕана туралларыгар баҕарда. Итиэннэ махтал суруктары туттарда.
Пётр Новгородов уонна нэһилиэк спордун ветераннара спонсордаан Пётр Юмшановка убаһа туттардылар.
Нэһилиэккэ тустуу тренеринэн иккис сылын Айтал Новгородов үлэлиир. Секцияҕа 1-11 кылааска диэри 33 оҕо дьарыктанар.
Бу күн тренер аһаҕас дьарык ыытта. Кэлбит ыалдьыттар, үрдүк таһымнаах тренердэр, оҕолор талааннаахтарын, маастарыстыбаларын, сатабылларын бэлиэтии көрдүлэр.
П. Скрябина