Быйыл Саха Өрөспүүбүлүкэтин Төрүт сокуонун биир автора, бөдөҥ политическай, государственнай деятель, биһиги киэн туттар, убаастыыр биир дойдулаахпыт Егор Михайлович Ларионов 85 сааһын туолар. 2015 сылга оскуолабыт кини дьоһун аатын ылбыта. Ытык киһибит 85 сааһын туоларынан, оскуолабытыгар быйыл Ларионов сыла биллэрилиннэ.
Бу бэлиэ сыл бастакы тэрээһинэ, тэрилтэлэринэн волейбол, ыытылынна. Оскуола директора Иван Андреевич сыл устата элбэх тэрээһин барыаҕын уонна бу кэрэхсэнэр спорт көрүҥэ волейбол күрэхтэһиитин географията кэҥээн, арҕаа сытар нэһилиэктэри, Искраны, Таастааҕы хабар баҕалааҕын эттэ.
Волейболга уопсайа 6 хамаанда кытынна: оскуола оҕолоро, оскуола үлэһиттэрин I-кы, II-с хамаандалара, уһуйаан, администрация, бэтэрээннэр. Бастаан утаа бэйэ-бэйэлэрин үөрэтэр курдук хамсанан баран, кэнникинэн эттэрэ-сииннэрэ «уһуктан», сиилэлэригэр киирэн бардылар. Сиэккэ нөҥүө туран туруоруулар, ыстаныылар, быһыылар, сыыһалар-халтылар, ыһыылар-хаһыылар… «Больше-меньше» диэнтэн тахсаары, 2 баалынан хотоору, өргө диэри тэҥнэһэн-тэҥнэһэн баран мүччү тахсыылар.
Эдэрдэр бэтэрээннэргэ, оҕолорго сымнаҕастык сыһыаннаһан, туттуна оонньуулларын көрөн спорт хабыр хапсыһыы буолбатаҕын, харыстабыллаах сыһыан баарын өйдүүгүн. Оҕолор бэйэлэрин холлоругар бэркэ оонньоотулар, ийэлэрин, убайдарын, эһэлэрин, эбэлэрин утары оонньооннор, бэйэлэригэр туох эрэ түмүгү оҥостубут буолуохтаахтар. Ол буоллаҕа күрэхтэһии биир сыаннай сыала.
Түмүккэ 3-с бочуоттаах миэстэҕэ нэһилиэк администрациятын хамаандата, 2-с миэстэҕэ оскуола үлэһиттэрин I хамаандата таҕыстылар. 1-кы миэстэни оскуола үлэһиттэрин II-с хамаандата ылан, көһө сылдьар кубогы тутта.
Татьяна Касьянова, Салбаҥ