Спорт национальнай көрүҥнэригэр XXII төгүлүн ыытыллар «Манчаары оонньуулара-2025» спартакиада Таатта улууһун Ытык Күөлүгэр от ыйын 7-13 күннэригэр ыытыллар. Ол иннинэ, бэс ыйын 20 күнүгэр, Мэҥэ Хаҥалас улууһугар норуот геройа Манчаары Баһылай төрөөбүт-үөскээбит история кэрэһитэ буолбут Арыылаах алааһыгар спартакиада эстафетатын уотун уматыы сиэрэ-туома буолуоҕа.
Эстафета маршрута Мэҥэ Хаҥалас улууһунан ааһан, бэс ыйын 28 күнүгэр Дьокуускайга Туймаада ыһыаҕар кэлиэҕэ, онтон Чурапчынан Таатта улууһугар тиэрдиэхтэрэ. Маршрут уопсай уһуна 765 км тэҥнэһэр.
Уот эстафетатын бөлөҕүн, 2005 с. Майаҕа, 2013 с. Чурапчыга, 2017 с. Үөһээ Бүлүүгэ, 2021 с. Бэрдьигэстээххэ ыытыллыбыт Манчаары оонньууларын «Уотун эстафетатын» салайааччыта, Дмитрий Горохов салайыаҕа. Эстафетаҕа өрөспүүбүлүкэ уһулуччулаах спортсменнара, тренердэрэ кыттыахтара:
— Дмитрий Горохов — СӨ физическэй культуратын уонна спордун үтүөлээх үлэһитэ, Үөһээ Дьааҥы улууһун бочуоттаах гражданина;
— Константин Жирков (Мэҥэ Хаҥалас) — мас-рестлиҥҥэ Россия спордун маастара, Аан дойду чемпиона;
— Марфа Троева (Таатта) — чэпчэки атлетикаҕа Россия спордун маастара, Бүтүн Россиятааҕы турнирдар призера;
— Гаврил Нохтунский (Чурапчы) — СӨ үтүөлээх тренерэ, Манчаары оонньуутун хас да төгүллээх чемпиона, уһун сүүрүү рекордсмена;
— Татьяна Жиркова (Мэҥэ Хаҥалас) — Россия спордун үтүөлээх маастара, саха спордун легендата.
Эстафета уотун сүрүн сыала-соруга Манчаары оонньууларын историятын билиһиннэри, чөл олоххо угуйуу буолар. Спартакиада үөрүүлээх аһыллыытын сиэрэ-туома Ытык Күөлгэ «Дьулуруйар Ньургун Боотур» стадиоҥҥо от ыйын 8 күнүгэр буолуоҕа.
Бэйэ информ.