Бүгүн, ыам ыйын 27 күнүгэр, Россияҕа библиотека үлэһиттэрин күнэ бэлиэтэнэр. Бу бэлиэ күнүнэн Хамаҕатта орто оскуолатын 1968 сыллаахха бүтэрбит оҕолортон түөрт кыыс библиотекарь идэтин баһылаан, культура эйгэтигэр үлэлээн ааспыттара сэдэх көстүү.
Емельянова (Винокурова) Ольга Петровна Хамаҕатта орто оскуолатыгар 5 сыл, онтон олохтоох библиотекаҕа 27 сыл устата билии-көрүү бараммат баайыгар ааҕааччылары сыһыаран 2013 сыллаахха диэри кылаатын киллэрбитэ. Ольга Емельянова күннээҕи үлэтин таһынан ааҕааччы духуобунас өттүнэн сайдыытын биир сүрүн соругунан оҥосторо. Айымньылары ырытыы, драматизацияны дьүөрэлээһин, ааҕааччылар конференциялара, ааҕааччылар “Күбэй” кулууптарын тэрийии – кини үлэтин ураты истиилэ буолара. Ольга Петровна бэйэтэ хоһоону ааҕарын сөбүлүүр буолан, хоһоонньуттар түмсүүлэригэр сылдьара, “Күбэй” түмсүүнү тэрийэн саха классиктарын айымньыларынан сценарий суруйан сценкалары, кыра испэктээктэри бэлэмнээн сыанаҕа туруорара, бэйэтэ сүрүн оруолларга оонньуура. Кини тэрийиитинэн “Фронтовиктар оҕолоро”, “Оттоон ааспыт оҕо сааспыт”, “Комсомол – эдэр сааспыт аргыһа”, “Ытыктыыр, саныыр учууталларбыт” курдук сонун хатыламмат ис хоһоонноох тематическай биэчэрдэрэ библиотека ситимин бастыҥ уопутун копилкатыгар киирбиттэрэ.
Петрова Клара Васильевна оҕо эрдэҕиттэн кинигэни умсугуйан ааҕара, гуманитарнай хабааннаах предметтэри сөбүлүүрэ. Ол да иһин Клара Васильевна олоҕун суола ити хайысханан салаллыбыта. Элбэхтик ааҕар, литератураны, тылы сэргиир буолан, библиотекарь идэтин баһылаан, ыраах Салбаҥ учаастагар ананан тахсыбыта. Салбаҥҥа 12 сыл устата олорон, библиотека нэһилиэккэ туох баар культурнай-сырдатар маассабай үлэ эргийэр киинэ буоларыгар кыттыһан үлэлээбитэ. Клара Петрова бэйэтэ депутакка талыллар, араас общественнай үлэҕэ кыттар. Салбаҥ биригээдэтин чиэһин көмүскээн волейболга оонньоон, уус-уран самодеятельность көрүүтүгэр үҥкүүгэ кыттан, араас субуотунньуктарга сылдьан, агитационнай-маассабай үлэҕэ миккиллэн Салбаҥ сайдыытыгар кылаата баара чахчы. Кырыы сиргэ дьиэ кэргэн духуобунай сайдыылаах буоларыгар араас хаһыаты, сурунаалы тиһигин быспакка суруйтаран ааҕалларыгар болҕомто ууран кэлбитэ, бэйэтинэн холобур буолбута.
Федосеева (Местникова) Клара Петровна идэтинэн Чөркөөх орто оскуолатыгар үлэлээбитэ. Оскуола библиотекарынан үлэлиир киһи үүнэр көлүөнэни иитиигэ бэйэтин кылаатын киллэрэр. Үлэлиир кэмнэригэр кинигэ фондата хаҥыырыгар, үөрэнээччилэри маассабай үлэ көмөтүнэн ааҕарга уһуйууга болҕомтотун уурбута. Библиотечнай уруоктары араас көрүҥүнэн ыытара, улууска үөрэнээччилэргэ ыытыллар библиотечнай-библиографическай билии олимпиадатыгар кытыннарара. Үлэ түмүгүнэн Таатта улууһугар педагог-библиотекардар куонкурустарыгар кыайыылаах буолбута. Республикаҕа ыытыллыбыт оскуола библиотекаларын икки ардыгар күрэхтэһиигэ 2 миэстэни ылан, Москва — Санкт-Петербург – Хельсинки — Стокгольм международнай стажировкаҕа сылдьыбыта. “Юные друзья книги” куруһуок үлэлэтэн ааҕааччыларын идэҕэ сыһыарара. Бэйэтин салгыыр, библиотекарь идэтин ылбыт үөрэнээччилэрдээх.
Харлампьева Варвара Федоровна 1972 сыллаахха культурнай-сырдатар училищены бүтэрэн баран Орто Халыма оройуонугар Хатыҥнаах бөһүөлэгэр библиотекарынан үлэтин саҕалаабыта. 1975 сыл Дьокуускай куоракка саҥа аһыллыбыт Сайсаар 3 №-дээх библиотекатыгар үлэҕэ киирбитэ. “Маяковскай библиотеката” диэн ааттанар библиотекаҕа сүнньүнэн студеннар, ыччаттар сылдьаллара. Күҥҥэ 200-чэкэ ааҕааччы наадыйар кинигэлэрин, источниктарын булан биэрэрэ. Араас курсовой, дипломнай үлэлэригэр ыйан-кэрдэн көмөлөспүтэ элбэх. Бастаан ааҕар саала библиотекарынан, 2006-2016 сылларга библиограбынан таһаарыылаахтык үлэлээбитэ. Библиограбынан үлэлиир кэмигэр кыраайы үөрэтэринэн дьарыктанан, картотека оҥорон, кинигэ тахсыытыгар кыттыһан үгүс үлэни ыытыста. Уопсайа 41 сыл үлэлээн 2016 сыллаахха тохтообута.
Бииргэ үөрэммит кыргыттар “Оскуола-производство-ВУЗ” бачыымынан оскуола кэнниттэн икки сыл комсомольскай путевканан Оля Винокурова, Клара Местникова Салбаҥ, Клара Петрова, Варя Харлампьева Кириэс Кытыл биригээдэлэригэр ыанньыксыттаабыттара. Билигин ааттаах-суоллаах дьоһун үлэһиттэр бочуоттаах сынньалаҥҥа олороллор.
Мария Винокурова