Хатыҥ Арыы нэһилиэгин «Далбар» дьахтар сүбэтин сатабыллаах салайааччылара, өр сылларга председателинэн үлэлии сылдьар бастыҥ общественницалар Аппааныга Дария Ивановна Мальцева, Кыһыл Дэриэбинэҕэ Раиса Аполлоновна Уваровская буолаллар. Граф Биэрэгэр үһүс сылын Саргылана Петровна Сметанина үлэлиир.
Дьахтар сэбиэтэ сыл устата былааннаах үлэни ыытар. Ол курдук, иистэнньэҥнэр, оҕуруоччуттар маастар кылаастарын ыыталлар, анал байыаннай дьайыы кыттыылаахтарыгар көмөлөһөллөр, дьиэ кэргэттэригэр болҕомто уураллар, араас республика, улуус, нэһилиэк акцияларыгар, тэрээһиннэригэр, форумнарыгар кытталлар, женсовет ветераннарыгар кырдьаҕастар күннэригэр бэлэх оҥорон туттараллар, И.Е. Винокуров аатынан Хатыҥ Арыы орто оскуолатын уонна Затон ситэтэ суох орто оскуолатын 9-11 кылаастарын выпускниктарыгар бэлэх туттараллар. Ону кытта Ил Дархан, РФ Президенин быыбарыгар общественнай кэтээччи буолан үлэлииллэр, тыа хаһаайыстыбатын сааскы, күһүҥҥү дьаарбаҥкаларыгар, нэһилиэккэ, улууска ыытыллар культурнай-маассабай тэрээһиҥҥэ, күрэххэ кытталлар.
Хоту зона дьахтар сэбиэттэрэ түмсэннэр, Кыайыы 80 сылынан, сквердэри уонна паамытынньыктары сырдатар буклет эстафетата ыытыллар.
Аны күһүн И.Е. Винокуров аатынан историяны уонна кыраайы үөрэтэр түмэлгэ илдьэн туттарыахтара.
Маны тэҥэ, дьахтар сэбиэтин председателлэрэ саастарын ситэ илик оҕолору кытта үлэлэһэр нэһилиэк общественнай комиссиятыгар бааллар. Дария Ивановна «Сыдьаайа» иис сыаҕын салайан үһүс сылын үлэлиир, республикаҕа ыытыллар «Илии сылааһа» күрэх кыайылаахтара, призердара буолаллар.
Бэс ыйын 10 күнүгэр Н.М. Рыкунов аатынан Намнааҕы кииннэммит библиотекаҕа улуустааҕы дьахтар сэбиэтин отчетнай-выборнай конференциятыгар Надежда Сивцева, Дария Мальцева, Саргылана Сметанина, Раиса Уваровская, Людмила Петрова, Варвара Слепцова, Надежда Белолюбская, Татьяна Софронова кыттыыны ылбыттара. Конференция Нам улууһун дьаһалтатын дьиэ кэргэн уонна ыччат политикатын отделын уонна улуустааҕы дьахтар сэбиэтин көҕүлээһининэн ыытылынна. Конференцияны дьиэ кэргэн отделын начальнига Екатерина Евстафьева ыытта, Нам улууһун баһылыга Юрий Слепцов кытынна. «Матери России» общественнай хамсааһын салайааччыта Марианна Дмитриевна Рожина аҕыс сыллаах ыыппыт үлэтин уонна улуус дьахтар сэбиэтин (председатель Ирина Сергеевна Находкина) үлэтин отчуотун иһитиннэрдэ. Конференцияҕа маны тэҥэ М.К.Аммосов аатынан ХИФУ профессора Мария Михайловна Прокопьева, анал байыаннай дьайыы кыттыылаахтарын дьиэ кэргэттэрин түмсүүтүн салайааччыта Майя Софронова, «Айталы Куо» дьахтар түмсүүтүн салайааччыта Юлия Жергина уо.д.а. кыттыыны ыллылар. Саалаҕа конференцияҕа кэлбит нэһилиэктэр дьаһалталарын исписэлиистэрэ, дьахтар сэбиэттэрин председателлэрэ, активтара, общественнай түмсүүлэр, «Матери России» уонна улуустааҕы дьахтар сэбиэтэ ыыппыт үлэтин биһирээтилэр. Салҕыы улуустааҕы дьахтар сэбиэтин председателигэр кандидаттары талыы буолла. Манна Прасковья Протопопова, Саргылана Индеева, Ирина Винокурова бэйэлэрин кылгастык билиһиннэрдилэр. Элбэх куолаһы ылан Ирина Семеновна Винокурова дьахтар сэбиэтин председателинэн талылынна.
Конференция кыттыылаахтара общественнай түмсүүлэр үлэлэригэр бэйэлэрин санааларын, көрүүлэрин эттилэр, киирбит этиилэр олоххо киирэллэригэр Нам улууһун бары ийэлэрэ, далбар хотуттара үлэлэһэргэ бэлэмнэр.
Надежда Сивцева