Бу уһун уҥуохтаах, толору эттээх-сииннээх, чекист формалаах, саабылатын уонна маузерын кириэстии кэппит киһи олорор. Милиция Якутскайдаҕы дивизионун командира Филипп Михайлович Евстафьев ити 1929 сыллаахха түспүт фотоснимога.
Филипп Хатыҥ Арыы нэһилиэгин быстар дьадаҥытын, былыргы үгэһинэн, дьадаҥы дьоҥҥо хос аат биэрэллэринэн, Халааныскай – Мэхээлэ Астаапыйап уола. Кинилэр билигин Санников аартыгынан мырааны дабайдахха, Кыыс Сүктүбүт диэн алаас арҕаа өттүгэр кыра чоҥолох күөллээх дүөдэҕэ олорбуттара. 1906 сыллаахха Филипп диэн уол төрөөбүтэ. Ол сири билигин Халааныскай диэн ааттыыллар. Кинилэр өрүс сүнньүгэр көһөн киирэн баайдарга хамначчыттаабыттара. Сэбиэскэй былаас буолбутун кэннэ Мэхээлэ уолун Куонда Кириэс оскуолатыгар үөрэттэрэ биэрбитэ. Филипп биэс кылааһы бүтэрбитэ.
Оччотооҕуга сиппит-хоппут, бөҕө-таҕа көрүҥнээх, сүүрбэ саастаах Филипп Намҥа младшай милиционерынан ылыллыбыта. Онтон Якутскайга киирэн старшай милиционерынан, тас сулууспа уонна административнай надзор начальнигынан үлэлии сылдьан, милиция дивизионун командирынан өрө таһаарыллыбыта. 1927-28 сс. ОГПУ этэрээтин састаабыгар киирсэн, Ксенофонтов, Артемьев күрээн халыы-талыы сылдьар баандаларын эккирэтиһэн Уус-Майа сиригэр тиийэн үлтүрүтүүгэ актыыбынайдык кыттыбыта. 1929 сыллаахха Булуҥҥа өрө турбут баандалары урусхаллааһыҥҥа сылдьыбыта, эр санаалаах сэрииһит буоларын көрдөрбүтэ.
1935 сыллаахха Москваҕа милиция икки сыллаах Киин оскуолатын бүтэрэн баран, Якутскай куоракка милиция начальнигынан анаммыта. Эһиилгитигэр партия уобаластааҕы комитета кинини Уус-Майа оройуонугар ыыппыта. Филипп Михайлович онно милиция начальнигынан икки сыл үлэлээбитэ. Ол долгуннаах кэмҥэ кини эмиэ сыыстаран үлэтиттэн уурайбыта. Москваҕа баран тимир суолга үлэлээбитэ. Төһө да алҕаһаабытын иһин патриот патриота өппүтэ. Аҕа дойдуну көмүскүүр Улуу сэрии фронугар хорсун саллааттар кэккэлэригэр киирбитэ. Кини кыргыһыы хонуутуттан эргиллибэтэҕэ.
Кылаас охсуһуутун кэмигэр, саҥа олоҕу тутууга чэкистэр үтүөлэрин норуот умнубат. Итиниэхэ бэйэтин сэмэй кылаатын киллэрсибит киһинэн Филипп Евстафьев буолар.
«Ленин суола», 1974 с.